MWISAMBO 3
Rahabe baadi mukumiine mwi Yehowa
Tubande kupwandikisha bu’twe be mw’iumbo dya Yeeriko. Dino eumbo dii mu nsenga ya Kanaana, mwi bantu bashii bakumiine mwi Yehowa. Nyi mubaadi mushaale uno mwana mukashi abetanyina bu Rahabe.
Nsaa ibaadi Rahabe kii nsongwakashi, baadi mupushe nkumo ya mushindo ubaadi Moyiise mutshibe Kalunga Kamonga na kutuusha beena Isaleele mu Ejiipitu. Baadi mupushe dingi mushindo ubaadi Yehowa mwibakwashe bwa kutshokola ngoshi ibaadi ayibalwisha beshikwanyi nabo. Binobino bapusha shi, beena Isaleele abashaala peepi na Yeeriko!
Rahabe baadi mupaashe ba mpuupa mwanda baadi mukumiine mwi Yehowa
Dingi efuku ku kyolwa, beena Isaleele babidi abende mu kupuupa eumbo dya Yeeriko. Abafiki kwa Rahabe. Bebatwesha mu nshibo. Bufuku, nfumu a mu Yeeriko bauku shi kwi bantu abaafiki mu kupuupa eumbo na shi abaatwele kwa Rahabe. Byabya nfumu batumu bantu bwashi bebakwate. Rahabe bafwamisha baaba ba mpuupa babidi pa kisasa kya nshibo yaaye na balungula bantu ba nfumu shi: ‘Ba mpuupa abekalanga pano, kadi abapu kwenda. Su nwenda binobino, nwi balombeene kwibakwata!’ Ouku bwakinyi Rahabe kwete kufwamisha ba mpuupa?— Mwanda mmukumiine mwi Yehowa na auku shi akyebe kupa beena Isaleele nsenga ya Kanaana.
Kumpala kwashi ba mpuupa bakatukye kwa Rahabe, abamulaa shi aye na ba mu kifuko kyaaye booso abakyebe kupanda pababutula Yeeriko. Ouku kibabamutekye bwa kukita?— Abamulungula shi: ‘Ata uno moshi wa bwanda bumonga weupudikye kwididishi dya nshibo yoobe. Su bokitshi byabya, tatwipaa muntu su ngumune e mu nshibo yoobe.’ Rahabe bakitshi nka byabya bibamulungula ba mpuupa bwa kukita. Ouku kibakitshika kunyima?—
Yehowa baadi mupaashe Rahabe na kifuko kyaye
Mafuku apeela kunyima, beena Isaleele abefunyu eumbo kushii tuleo. Munda a mafuku asamombo bakwete kwifunya eumbo, mususa umune kwifuku dyooso. Kadi p’efuku dya musambo, abefunyu eumbo misusa musambobidi. Akupu booso abele eunga dikata. Yehowa baponesha bimano by’eumbo. Kadi nshibo i na mooshi umonga upudikye pasha p’edidishi ibashala imane! Okwete kumona yaaya nshibo mu kifwatulo su?— Rahabe na ba mu kifuko kyaye abapanda!
Kileshesho kya Rahabe nkilombeene nkulongyesha kinyi?— Rahabe baadi mukumiine mwi Yehowa mwanda baadi mupushe myanda yooso ya kukanya ibaadi Yehowa mukite. Obe namu okwete kulonga myanda ibungi ya kukanya pabitale Yehowa. We mulombeene kukumiina mwadi bu bibaadi Rahabe mukite su?— Atuuku shi okumiina!