Mwanda wa 43

Yooshwa taadi mukunkushi

MOYIISE akyebe kutwela na beena Isaleele mu Kanaana. Nyi bwakinyi batekyele Yehowa shi: ‘Kumina nkile lungi lupese lwa Yordano, dingi mone eumbo dibuwa.’ Kadi Yehowa bamulungwile shi: ‘Bibakumbana! Tshiba kwakula naami pa uno mwanda!’ Ouku bwakinyi Yehowa bakwile byabya?

Mwanda wa kibaadi kikitshikye nsaa ibaadi Moyiise mukupile mukombo ku lubwebwe. Tentekyesha shi, Moyiise na Aarone tababaadi batumbishe Yehowa. Tababaadi balungule mwilo shi Yehowa nyi baadya kwibatushila mema mu lubwebwe. Pa mwanda wa byabya, Yehowa bambile shi Moyiise takatwesha beena Isaleele mu Kanaana nya.

Byabya kunyima kwa myeshi ipeela, Aarone bafwile ndyo Yehowa nkulungula Moyiise shi: ‘Ata Yooshwa na omwimikye kumpala kwa tshiite-mwakwidi Eleazaare pamune na mwilo ushima. Na kumpala kwa bantu booso, webalungule shi Yooshwa ndyo mukunkushi aabo mupya.’ Moyiise bakitshine nka bibamulungwile Yehowa bu byokwete kumona mu kifwatulo.

Akupu Yehowa balungula Yooshwa shi: ‘Ikala mukankamane, totshinanga. Mwanda obe nyi atwele na uno mwilo mwiumbo dya Kanaana, dinatshipile bwa kwibapa, neekala noobe.’

Kunyima, Yehowa nkulungula Moyiise bwashi akamine kunundu kwa Mwengye wa Nebo mu nsenga ya Moabe. Kwakwa, Moyiise mukumbeene kumona nsenga ibuwa ya Kanaana ku dingi eshiya dya Mwela wa Yoordano. Yehowa nkwamba shi: ‘Dino nyi eumbo dinaadi mulee bwa kupa baana ba Abrahame, Isaake na Yaakobo. Nakulesha dyanka ku meso oobe’be nabeene, anka twemutwele nya.’

Moyiise bafwidiile kwakwa ku nsongo a Mwengye wa Nebo. Baadi na bipwa 120. Baadi kina bukome, na meso aaye abaadi aky’aamono kalolo. Bantu nkwinyongola ngofu na kudila mwanda wa lufu lwa Moyiise. Kadi be na muloo wa kupeta Yooshwa bu mukunkushi aabo mupya.

Mbadiko 27:12-23; Miiya Ikituulwe 3:23-29; 31:1-8, 14-23; 32:45-52; 34:1-12.