Yehowa basangula Yoshua

Kunyima kuaye kukunkusha muilo wa bena Isalele munda mua bipua bibungi, Moyise bafikile ku nfudiilo kua muwa waye. Yehowa nkumulungula shi: ‘Ta noobe akatuesha bena Isalele mu Nsenga ya mulayilo nya. Anka, nakuleesha yanka.’ Moyise batekiele Yehowa buadia kusangula mukunkushi mupia bua muilo waye. Yehowa nkumulungula shi: ‘Enda kui Yoshua, omulungule shi nnaye.’

Moyise nkulungula muilo shi akiebe kufua mu mafuku apeela, anka Yehowa bamulunguile bua kusangula Yoshua buadia kuibatuesha mu Nsenga ya Mulayilo. Moyise nkulungula Yoshua shi: ‘Totshiinanga nya. Yehowa akukukuasha.’ Kunyima kua biabia, Moyise baadi mukaamine ku muengie wa Nebo kubaadi Yehowa mumuleeshe nsenga ipia Ibaadi mulee Abalahama, Isaake na Yakobo. Moyise baadi mufue na bipua 120.

Yehowa nkulungula Yoshua shi: ‘Abuka muela wa Yordane, wende mu Kanaana. Nakakukuasha nka binakuashishe Moyise. Anka ikala obadika Muiya wande efuku dioso. Totshinanga. Nyinga eshimba. Enda okakite binakulungula.’

Yoshua nkutuma ba mpuupa babidi bua nkatala kibundi kia Yeriko. Atukesambila bibungi pabitale bibaadi bikitshikie mu muisambo aulondo. Pabaabadi baalukiile, abafikile na mukandu shi ibaadi nsaa ibuwa kuenda mu Kanaana. Butookie bua diadia efuku, Yoshua balunguile muilo buaudia kushimuna tushibo tuabo tua mapema. Aye nkutuma ba tshiite muakuidi babaadi abatuala musheto wa kilombeeno kumpala bua kusabuka Muela wa Yordane. Muela ubaadi uwule na mema. Kadi pabafikile ngua ya ba tshiite muakuidi mu mema, muela ubalekiele mpumo, ao nkubanga kukama! Ba tshiite muakuidi nkutambuka kubanga ku kiese abo nkuimana munkatshi mua muela pabaadi apasabuka bena Isalele booso dingi eshiya. Omono shi kino kilengieleshi kibaadi kibatentekieshe muanda kinyi ubaadi Yehowa muibakitshiine ku Kalunga Kamonga?

Nfudiilo a bioso kunyima kua biabia bipua bioso, bena Isalele abafikile mu Nsenga ya Mulayilo. Abaadi na kia kuibaka mashibo na bibundi. Abaadi dingi na kia kudima mafuba a mitshi, a nfinyo na a mitshi ya pome. Dibaadi eumbo adialaala mabeele na buuki.