Mwanda wa 45
Abasabuka Mwela wa Yoordano
TALA! beena Isaleele bakwete kusabuka Mwela wa Yoordano! Kadi mema e kunyi? Mwanda mpeshi anokaa ngofu mu aa mafuku, mwela ubaadi uule kumpala kwabo kufika. Kadi binobino mema ooso abakama! Dingi beena Isaleele bakwete kusabuka mu nsenga iume nka bibabakitshine mu Kalunga Kamonga! Mema ooso aa ngende kunyi? Tubande kutala.
Pabalombene nsaa yashi beena Isaleele basabukye Mwela wa Yoordano, Yehowa balungwile Yooshwa bwashi alungule mwilo shi: ‘Ba tshiite-mwakwidi basemune musheete wa kilombeno na bakile kumpala kwenu. Su ngwa yabo ibakumu mu mema a Yoordano, paapa mema aatshibika.’
Ndjo ba tshiite-mwakwidi nkutwala musheete wa kilombeno, abo nkukila kumpala kwa mwilo. Pababafikile ku Yoordano ba tshiite-mwakwidi abayimene mu mema. Mema abaadi aakidi na mpumo ibukopo na abaadi akile bula. Kadi, pabakumine mikoolo yabo mu mema, mema abalekyele kwalala! Nyi mwanda wa kukanya! Yehowa baadi muyimikye mema aakatukila ku nsulo, ngulu umunenka. Byabya, kunyima a kapindji kapeela mema ooso abakama!
Ba tshiite-mwakwidi basemune musheete wa kilombeno abatwele munkatshi mwa mwela ku ngwa yume. Okwete kwibamona mu kifwatulo su? Abayimana mwanka, beena Isaleele booso abasabuka Mwela wa Yoordano ku ngwa yume!
Pabapu kusabuka bantu booso, Yehowa balungula Yooshwa bwashi alungule balume be bukome 12 shi: ‘Twelayi mu mwela mwimane ba tshiite-mwakwidi na musheete wa kilombeno. Nusemune mabwe 12, na nwiatuule mutuuto pa mbalo yanukyebe kulala. Byabya, mafuku e ku meso, apenwipusha bana beenu akipatuula ano mabwe, anwibalungula shi ano mabwe aalesha shi mema a Yoordano abatshibikile kumpala kwa musheete wa kilombeno pabausabukile mu Yoordano. Ano mabwe aakyebe kwinutentekyesha uno mwanda wa kukanya.’ Yooshwa bayimikile dingi mabwe 12 mbalo ibaadi ba tshiite-mwakwidi bemane munkatshi mwa mwela.
Akupu balungwile ba tshiite-mwakwidi abaadi basemune musheete wa kilombeno shi: ‘Katukayi mu Yoordano.’ Pababakatukile, mwela ubabangile dingi kwalala ngofu.