Mwanda wa 41

Nyoka a kyaamo kimonga

TALA kino kintu! Akimweneka bu nyoka a binyibinyi mwipombeele ku kilùu. Ta mbyobyo su? Uno nyoka mbamukite na kyaamo kimonga. Yehowa balungwile Moyiise bwa kumupomba ku kilùu bwashi bantu bekale abamutala na bashaale na muwa. Kadi ingi nyoka yooso i paashi nyi nyoka y’eyendo. Ngisume bantu yebapa maladi. Ouku shi mbwakinyi?

Mwanda beena Isaleele abaadi bayipule Moyiise na Efile Mukulu. Abaadi abedidi shi: ‘Bwakinyi nwi betutushe mu Ejiipitu bwa tudya kufwa mu kabaaka? Pano takwi nkya-kudya sunga mema. Dingi mashimba ngetufudiile na ano maana.’

Kadi maana nyi nkidibwa kibuwa. Yehowa baadi mukite kipaso bwa kwibapa anka. Na dingi bakitshine kingi kipaso bwa kwibapa mema. Kadi mwilo taubaadi na lutumbu pabitale mushindo ukwete kwibakwasha Efile Mukulu. Ndjo Yehowa nkutuma ino nyoka ya lulengu lwibubi bwa kunyooka beena Isaleele. Nyoka ibebasumu, bebungi ba kwabadi abafu.

Ndjo bantu nkufika kwi Moyiise abo nkwamba shi: ‘Tubakitshi bubi, pakwinwipula obe na Yehowa. Binobino teka Yehowa ayiishe nyoka kula neetu.’

Ndjo Moyiise nkutekyela mwilo. Paapa Yehowa nkulungula Moyiise bwa kukita uno nyoka a kyaamo kimonga. Bamulungula shi amupombe ku kilùu bwashi muntu ooso abasumu kwi nyoka atale uno nyoka a kyaamo kimonga. Moyiise bakitshine nka bibaadi bimulungule Efile Mukulu. Bantu abaadi basumibwe abatadile kwi yawa nyoka a kyaamo abo nkupanda.

Uno mwanda wi na kyawitulongyesha. Twi kwamba shi, bebungi ba kwatudi be bu baba beena Isaleele abaadi basumibwe na nyoka. Atwe booso twi bu bantu be pepi na lufu. Tala pepi noobe, okyebe kumona shi bantu bakwete kununupa, kukumba, na kufwa. Mwanda mulume na mukashi ba kumpala, Adame na Eeva, abaadi batombokyele Yehowa, na dingi atwe booso twi bana baabo. Kadi Yehowa mukite bwashi tupete muwa wa looso.

Yehowa baadi mutume Mwana aaye, Yesu Kidiishitu, pano pa nsenga. Abaadi bapudikye Yesu ku mutshi, mwanda bantu bebungi abaadi abapwandikisha shi aye baadi muntu mubi. Kadi Yehowa baadi mutushe Yesu bwa kwitupasha. Su tubakulupila mwadi, su tubamulondo, atukyebe kupeta muwa wa looso. Kadi kunyima atukalongo ingi myanda pabitale uno mwanda.

Mbadiko 21:4-9; Yowano 3:14, 15.