Mwanda wa 48
Budimu bwa beena Gabaone
MAUMBO ebungi a mu Kanaana aelumbuula bwa kwenda mu kulwa na Isaleele ngoshi. Bakwete kwela binangu shi mbakumbeene kwibatshokola. Kadi bantu ba mu Gabaone, lupata lwi pepi nabo, tabakwete kupwandikisha byabya nya. Abauku shi Efile Mukulu kwete kukwasha beena Isaleele na tabakumina kwenda mu kulwa ngoshi na Efile Mukulu. Ouku kibakitshine beena Gabaone?
Abatshile kitshibilo kya kwilesha bu bantu bashalele mwiumbo dikula kukile. Ndjo bangi ba kwabadi babafwadile binyefwa na bilato bisasukye. Abaatshile bimpaaya bisasukye bebitenteka ku ma mpunda aabo na mikate yume. Abo nkwenda kwi Yooshwa ba mulungula shi: ‘Atufiki kwiumbo dii kula bibi, mwanda wa Yehowa Efile Mukulu oobe. Twi bapushe nkumo yaaye, byooso byadi mukite mu Ejiipitu. Byabya bakulu beetu mbetulungule shi atayi bintu bya kudya bwa eshinda nwende nwi balungule shi: “Twi bafubi beenu. Etuleeyi shi tanwitulwiisha ngoshi.” Talayi mikate na bilamba byetu mbiibi bisasukye pa mwanda w’eshinda bula na mikate yeetu ibaapu kuuma ibafiki bifingifingi.’
Yooshwa na bangi bakunkushi abakuminyine bibebalungwile beena Gabaone. Abo nkwibalaa shi tabebalwiisha ngoshi nya. Kadi kunyima kwa mafuku asatu beena Isaleele abaukile shi beena Gabaone mbashaale pepi nabo.
Yooshwa bebepwishe shi: ‘Bwakinyi nwibetudimbe pa kwamba shi twi bakwibula bibi?’
Beena Gabaone abalulwile shi: ‘Twi bakite byabya mwanda abaadi betulondele bibaadi Yehowa Efile Mukulu mwinulee bwa kwinup’eumbo dishima dya Kanaana. Nyi bwakinyi atwikalanga na moo shi nwibalombeene kwitwipa.’ Kadi beena Isaleele abakumbeeshe mulayilo waabo na tababayipayile beena Gabaone nya. Anka abebatudile bu bapika babo.
Nfumu a mu Yelusaleme baadi mufiitshile beena Gabaone munda mwanda abadiile kipwano na beena Isaleele. Balungwile bangi banfumu bananka shi: ‘Fikayi kwandi nunkwashe bwa kulwa na Gabaone.’ Nyi bibakitshine baba ba nfumu batano. Beena Gabaone abaadi badimukye pa kukita na beena Isaleele kino kipwano kibaadi kitume bano banfumu bwa kulwa nabo su? Atukyebe kwibimona.