Mwanda wa 49

Nguba bayimana mbalo imune

BANDA kutala Yooshwa. Kwete kwamba shi: ‘Nguba, imana!’ Na nguba bayimeene mbalo imune. Nguba bayimeene munkatshi mw’eulu munda mw’efuku dishima. Yehowa baadi mukite mwanda wa kukanya! Kadi tubande kutala bwakinyi Yooshwa akyebe shi nguba atungunukye na kumunwika.

Pababangile banfumu batano bebubi ba mu Kanaana kulwiisha beena Gabaone, bano abatumine muntu kwi Yooshwa bwa kuteka bukwashi. Yawa muntu bambile shi: ‘Fika kwatudi bukidi bwa kwitupaasha. Banfumu booso ba mwiumbo abafiki mu kulwa na bafubi boobe.’

Yooshwa na bantu baaye booso ba ngoshi abayile. Abatambukile bufuku bushima. Pababafikile ku Gabaone, basalayi ba banfumu batano abatshinyine abo nkubanga kusuuka. Nyi paapa Yehowa nkwibanokyesha mwiyilu mabwe akata, na basalayi bebungi abafwile mwanda wa mabwe kukila baaba bababadi bakupile kwi bantu ba Yooshwa.

Yooshwa bamwene shi nguba taadi pepi na kupona. Mufito aukyebe kutwela, na dingi basalayi bebungi ba banfumu batano bebubi abakyebe kusuuka. Nyi bwakinyi Yooshwa batekyele Yehowa na bambile shi: ‘Nguba, imana!’ Pabatungunukile nguba na kumunyika, beena Isaleele abapetele mushindo wa kutshokola mpa na ku nfudiilo.

Kubaadi banfumu bebungi bebubi mu Kanaana na bashikwe mwilo w’Efile Mukulu. Bibaadi byate Yooshwa na beena ngoshi baaye bipwa bisamombo bwa kutshokola banfumu 31 ba mwiumbo. Kunyima kwa byabya, Yooshwa bamwene shi abitungu kwabuula eumbo dya Kanaana muyile bisamba bya beena Isaleele bibaadi na lukalo na bipindji bya nsenga.

Kunyima kwa bipwa bibungi, Yooshwa bafwile na bipwa 110. Pabaadi Yooshwa na benaye ba kyakya kipungo bakii na muwa, mwilo ubaadi aukokyela Yehowa. Kadi pabafwile baaba bantu bebuwa, mwilo ubabangile kukita myanda ibubi na nkalakasho ibabangile. Aa mafuku nyi ababadi na lukalo na bukwashi bw’Efile Mukulu.

Yooshwa 10:6-15; 12:7-24; 14:1-5; Bansushi 2:8-13.