Mwanda wa 52

Gideone na bantu baaye 300

OKWETE kumona akikitshika pano su? Bano mbalume beena ngoshi ba mu Isaleele. Bano balume babandame bakwete kutoma mema. Uno mwimane pepi nabo nyi Nsushi Gideone. Kwete kutala mushindo wabakwete kutoma mema.

Tala kalolo byabadi belekeene pabitale mushindo wabakwete kutoma mema. Bangi bakwete kutoma beele milomo yooso mu mema. Kadi ungi kwete kukaka mema mwiyasa dyaaye, bwashi ekale amono byooso bikwete kukidika mbalo yaadi. Byabya bibuwa mwanda Yehowa balungwile Gideone bwashi asangule nka penda yawa kwete kutala nsaa yakwete kutoma. Pabitale baba bangi, Efile Mukulu bambile shi abitungu balukiile ku nshibo. Tubande kutala bwakinyi bakwile byabya.

Beena Isaleele be mu malwa akata. Mwanda abalekye kukokyela Yehowa. Bantu ba mu Madyane mbapwe kwibamuna na bakwete kwibakyengyesha. Byabya beena Isaleele abadidiile Yehowa bwashi ebakwashe, Yehowa nkupusha kudila kwabo.

Yehowa balungwile Gideone bwashi abungye kisaka kya beena ngoshi, Gideone nkubunga bantu 32 000. Kadi beshikwanyi naabo be na basalayi 135 000. Kunyima Yehowa balungwile Gideone shi: ‘Bantu boodi nabo mbakile bungi.’ Bwakinyi Yehowa bakwile byabya?

Bakwile byabya mwanda su Isaleele batshokola ngoshi, mbalombeene kupwandikisha shi abatshokola ku bukome bwabo abo banabeene. Mbakumbeene kupwandikisha shi tabekalanga na lukalo lwashi Yehowa ebakwashe. Ndjo Yehowa nkulungula Gideone shi: ‘Lungula bantu booso be na moo balukiile kwabo.’ Gideone pabakwile bino, bantu 22 000 abalukiile kwabo. Kubashadile penda bantu 10 000 bwa kulwa na basalayi 135 000.

Kadi, teemesha! Yehowa bakwile shi: ‘Bano bantu bakii bakile bungi.’ Aye nkulungula Gideone bwashi ende na bantu bakatome mema mu uno mwela. Kunyima alushe bano booso abeele milomo yaabo yooso mu mema bwa kutoma. Yehowa balayile Gideone shi: ‘Na bantu 300 bakakye mema mu masa bwa kutala nsaa yabakwete kutoma mema nyi bankupasha nabo.’

Nsaa ya ngoshi ibakumbana. Gideone baabuula bantu baaye 300 mu bisaka bisatu. Baapa muntu ooso mpungi na malondo mwi bimunyi. Pepi na midi ya bufuku, abo booso abefunyiishe mbalo ibaadi ishaale basalayi ba beshikwanyi. Akupu, mu yaya nsaa, abo booso nkwela mpungi yaabo na kutanya malondo aabo na kwela misaase shi: ‘Lupete lwa Yehowa na lupete lwa Gideone!’ Nsaa ibabuukile basalayi ba beshikwanyi, abaadi mu kafutakanyi na moo. Abo booso nkubanga kusuuka, beena Isaleele nkutshokola ngoshi.

Bansushi shapitre 6 mpa na ku 8.