Mwanda wa 55
Ka nsongwalume kakinga akafubila Efile Mukulu
KANO ka nsongwalume akamweneka buwa su? Eshina dyako nyi Samwele. Na muntu mutuule mboko ku mutwe wa Samwele nyi Eli. Bano bakwete kutwala Samwele kwi Eli, nyi nshaaye Elkana na nyinaaye Aana.
Samwele enka na penda bipwa binanka. Kadi akyebe kushaala kuno ku tabernakele a Yehowa na Eli na bangi ba tshiite-mwakwidi. Bwakinyi Elkana na Aana mbalombeene kutwala mwana kii mukinga bino bwashi afubile Yehowa ku tabernakele? Tubande kutala.
Ndambo ya bipwa kumpala kwashi bino bikitshikye Aana baadi mwinyongole ngofu. Baadi mwinyongole mwanda tabaadi atanda, kadi baadi na lukalo lukata lwa kupeta mwana. Nyi bwakinyi dingi efuku pabaadi Aana mwende ku tabernakele, baadi mwele luno luteko: ‘Yehowa tondubanga! Su bompa nsongwalume, nakulambula anka bwashi akufubile mafuku ooso a muwa waye.’
Yehowa balulwile luteko lwa Aana, aye nkutanda Samwele kunyima kwa myeshi. Aana baadi mufule uno nsongwalume mukinga ngofu aye nkubanga kumulongyesha myanda ya Yehowa pabaadi kii mukinga ngofu. Balungwile mulume aaye shi: ‘Su Samwele batshibi kwomwa, paapa nende naye ku tabernakele bwashi akafubile Yehowa.’
Bino nyi bikwete kukita Aana na Elkana byomono mu kino kifwatulo. Bu bibaadi baledi baye mbapwe kumulongyesha kalolo, Samwele baadi na muloo wa kufubila Yehowa kuno ku tabernakele. Ku kipwa kyooso Aana na Elkana abaadi abafiki mu kulangwila ku uno tabernakele mukata na bwa kutala mwana aabo nsongwalume. Na kipwa kyooso Aana baadi atwadila Samwele kikotshi kipya kishi na maboko.
Pabaadi apende bipwa na kutshila, Samwele baadi atungunuka na kufubila Yehowa ku tabernakele na dingi Yehowa na mwilo abaadi bamukumiine. Kadi baana ba Eli, tshiite-mwakwidi mukata e panundu, Hofeni na Pinase tababaadi buwa nya. Abaadi abakitshi myanda ibungi ibubi, na abaadi abatakula bangi mu kupela kukokyela Yehowa dingi. Bibaadi abitungu shi Eli ebakaashe bu ba tshiite-mwakwidi, kadi baadi mwibalekyele.
Nsongwalume Samwele tabaadi atadiila kintu kibubi sunga nkimune kibaadi akikitshika mu tabernakele bwashi kimukutshishe kufubila Yehowa nya. Kadi bu byabidi shi nkapenda bantu bapela nyi abaadi bafule Yehowa, kubaadi kukile bipwa bibungi kushi Yehowa kwisamba na muntu kampanda. Pabakudile Samwele ndambo, tala kibakitshikile:
Samwele mulaale mu tabernakele nsaa ibapusha eyi adimubuusha. Baluula shi: ‘Nnaami uno.’ Na aye nkubuuka nkwenda lubilo kwi Eli aye nkumulungula shi: ‘Nnaami uno mwanda bonyitanyina.’
Kadi Eli balulwile shi: ‘Ntshii mukwitanyine, aluka okalale.’ Samwele balukiile mu kulala.
Akupu bapushishe dingi eyi adimwitanyina: ‘Samwele!’ Paapa Samwele balukiile dingi lubilo kwi Eli amulungula shi: ‘Nnaami uno mwanda bonyitanyina.’ Kadi Eli bamwalulwile shi: ‘Ntshii mukwitanyine, mwan’ande aluka mu kulala.’ Samwele nkwaluka mu kulala.
Eyi nkwitanyina mususa wa kasatu shi: ‘Samwele!’ Samwele nkwenda lubilo kwi Eli, aye nkumulungua shi: ‘Nnami uno mwanda bonyitanyina.’ Binobino Eli bashingulwile shi Yehowa nyi kwete kumwitanyina. Ndjo aye nkulungula Samwele shi: ‘Aluka mu kulala. Su bakwitanyina dingi, walule shi: “Akula Mwanana, mufubi oobe ateemesha.”’
Nyi bibakitshine Samwele, bakwile pabamwitanyine Yehowa. Yehowa balungwile Samwele shi akyebe kunyooka Eli na baana baaye. Kunyima Hofeni na Pinase abafwile mu ngoshi na beena Filistina. Pabapushishe Eli baponene pashi nkwitshokola nshingo aye naamu nkufwa. Byabya eyi dya Yehowa dibamwekyele bu dya binyibinyi.
Samwele bakudile, aye nkufika bu nsushi a ku nfudiilo mu Isaleele. Pabanunupile, bantu abamutekyele shi: ‘Etupe nfumu a kwitukunkusha.’ Samwele tabakuminyine kukita byabya nya, mwanda Yehowa nyi baadi nfumu aabo a binyibinyi. Kadi Yehowa bamulungwile bwashi ateemeshe abimulungula mwilo.
1 Samwele 1:1-28; 2:11-36; 4:16-18; 8:4-9.