Samwele baadi mutungunukye na kukita myanda ibuwa

Samwele baadi mukinga ngofu, baadi mushaale na kufuba ku tabernakele, mbalo ibaadi bantu abafiki mu kulangwila Yehowa. Ouka bibaadi nshalelo a Samwele ku tabernakele su? Tubande kulonga mwanda utale Aana nyinaaye na Samwele.

Munda mwa bipwa bibungi, Aana tabaadi mupete mwana aku namu baadi na lukalo lwa kupeta sunga mwana umune. Ndjo aye nkuteka Yehowa na nkumulaa bwa kumulambula yawa mwana. Baadi mulee shi su atanda mwana, akamutuulu ku tabernakele bwashi ashaale na kufuba kwanka. Yehowa nkwaluula luteko lwaye, na aye nkutanda mwana. Eshina dya mwana nyi Samwele. Na anka bu bibaadi Aana mulee, nsaa ibalombeeshe Samwele bipwa bu bisatu sunga binanka, bakamutuudile ku tabernakele bwashi akafubile Efile Mukulu kwakwa.

Eli baadi tshite-mwakwidi mukata e panundu a ku tabernakele. Bana baye babidi abaadi abafubu kwanka. Tentekyesha shi tabernakele baadi nshibo ya kulangwila Efile Mukulu, na bibaadi abitungu shi bantu bakite myanda ibuwa kwanka. Kadi bana ba Eli abaadi abakitshi myanda i bubi bukile. Samwele baadi auku byooso bibabadi abakitshi. Byabya, Samwele baadi mukite myanda ibubi bu bibaadi abikitshi bana ba Eli su?— Nya, baadi mutungunukye na kukita myanda ibuwa, anka bu bibabadi bamulongyeshe kwi baledi baaye.

Omono naminyi, Eli baadi mulombeene kukita kinyi na bana baaye babidi?— Baadi mulombeene kwibanyoka. Tabaadi mulombeene kwibapa matalwa a nkafuba mu nshibo y’Efile Mukulu su musango umune nya. Kadi Eli tabaadi mukite byabya nya; byabya, Yehowa baadi mufiite munda ngofu pa mwanda waye na wa bana baye babidi. Yehowa nkwata kitshibilo kya kwibanyoka.

Dingi efuku pabaadi Samwele mulaale bufuku, aye nkupusha muntu amwitanyina shi: ‘Samwele!’ Aye nkwenda lubilo kwi Eli, kadi Eli nkumwaluula shi: ‘Ntshii mukwitanyine.’ Bino bibaadi bikitshikye misusa yooso ibidi. Kunyima kwa mususa wa kasatu, Eli nkulungula Samwele shi su bopusha dingi dyadya eyi, aluula shi: ‘Akula Yehowa, nkwete nkuteemesha.’ Anka byabya ndjo bibakitshine Samwele. Nsaa ibaadi Yehowa mulungule Samwele shi: ‘Lungula Eli shi nakyebe nkunyoka na bana boobe pa mwanda wa myanda i bubi yabakwete kukita.’ Omono shi bibaadi bibofule bwashi Samwele alungule Eli uno mwanda?— Nya, tabibaadi bibofule nya. Kadi, Samwele baadi na moo, bibaadi abitungu aakule bibamulungula Yehowa. Bibaakwile Yehowa bibaadi bya binyibinyi. Bana babidi ba Eli abaadi bebayipe, na Eli namu’nyi nkufwa.

Samwele nyi nkileshesho kibuwa bwetu. Baadi mukite myanda ibuwa sunga byekala shi bangi bantu abaadi abakitshi myanda ibubi. Kadi oobe namu? Okumiina kwikala bu Samwele na kutungunuka na kukita myanda ibuwa su? Su okita byabya, okyebe kusangasha Yehowa na baledi boobe.