Mwanda wa 57
Efile Mukulu basangula Daavide
OKWETE kumona kikwete kukitshika su? Uno nsogwalume bakatuka mu kupaasha mwana a mukooko ku ngala ya kimungu. Uno nyema ekalanga mufikye akwata kaana ka mukooko bwa kwikadya. Kadi uno nsongwalume bamulondo na bafungusha kaana ka mukooko ke ku meno a nyema a bukyelo. Na nsaa ibamuulukila kimungu, uno nsongwalume bekikwata bekikupila paashi na bekipaa! Ekalanga mupashe ungi mukooko ku meno a ntambwe. Yawa ta mwana e n’eshimba di bukopo su? Ouku eshina dyaaye su?
Uno nsongwalume, nyi Daavide. Mushalele mu lupata lwa Beeteleema. Obede ndjo baadi nshaaye-kulu, mwana mulume a Luuta na Boaze. Oky’ebatentekyesha su? Yeese ndjo baadi nshaaye na Daavide. Daavide baadi mulami a mikooko ya nshaaye. Baadi mutandikye bipwa 10 kunyima kwa Yehowa kusangula Saule bu nfumu.
Dingi efuku Yehowa balungwile Samwele shi: ‘Uusha mwimu wibuwa na wende ku nshibo ya Yeese ku Beeteleema. Ne musangule umune a ku baana baaye balume bwashi ekale nfumu.’ Samwele pabamwene Elyabe mwana mbedi a Yeese, bakwile aye nabeene shi: ‘Binyibinyi uno nyi abadi basangule kwi Yehowa.’ Kadi Yehowa bamulungwile shi: ‘Totalanga lukyebo lwaye sunga kishisa kyaye kila. Ntshi mumusangule bu nfumu nya.’
Ndjo Yeese nkwitamina Abinadabe mwana aaye mulume amutwala kwi Samwele. Kadi Samwele bambile shi: ‘Nya, uno dingi Yehowa tamumusangule.’ Akupu Yeese bafikile na Shaama mwana aaye mulume. Samwele bambile shi: ‘Uno’u nya, Yehowa tamumusangule.’ Yeese batwadile baana baye balume musambobidi kwi Samwele, kadi Yehowa tabaadi musangule su ngumune a kwabadi. Samwele bayipwishe shi: ‘Bano ndjo ba nsongwalume boobe booso su?’
Yeese balulwile shi: ‘Ku kii kushaale mukile bukinga. Kadi mwende mu kudiisha lombe lwa nyema.’ Pababaafikile na Daavide, Samwele bamwene shi baadi nsongwalume ebuwa mulongame. Yehowa bambile shi: ‘Ebwe omushingye mwimu, nnaaye.’ Bino ndjo bibakitshine Samwele. Nsaa yashi Daavide afikye bu nfumu a Isaleele ibaadi ikii kumpala.