Mwanda wa 58
Daavide na Golyate
BEENA Filistina abafiki dingi mu kulwisha beena Isaleele ngoshi. Batuutu ba Daavide basatu tabadi binobino basalayi ba Saule. Dingi efuku Yeese balungwile Daavide shi: ‘Atshila bakwenu balume ndambo ya ntete ya bukula bwa mikate na mikate. Wende okebamone su be bibuwa.’
Nsaa ibafiki Daavide mu mbalo ishale basalayi, bende lubilo ku mulongo wa beena ngoshi bwa kutala bakwabo. Golyate mwina Filistina batuukile bwa kusenga beena Isaleele. Baadi akitshi bino efuku dyooso, ku namashika na ku kyolwa munda mwa mafuku 40. Aye nkwela musaase shi: ‘Sangulayi mulume umune afikye bwa kulwa naami. Su antshokola na kungipaa, atwikala bapika beenu. Kadi su namutshokola na kumwipa, anwikala bapika beetu. Netompena nenu, mpeyi muntu bwashi tulwe naaye.’
Daavide bayipwishe bangi baku basalayi shi: ‘Muntu atshokola uno mwina Filistina na kukaasha buufu kwi Isaleele abamukitshina kinyi?’
Basalayi abambile shi: ‘Saule apa yawa muntu bupeta bwibungi. Na amupa mwana aaye mukashi bwashi amwibakile.’
Kadi beena Isaleele booso abaadi abatshiinyi Golyate mwanda muntu sha bukome. E bula bwa metre 3, na dingi ena ungi musalayi mumutwadile ngabo.
Bangi basalayi abayile mu kulungula Nfumu Saule shi Daavide akyebe kulwa na Golyate. Kadi Saule nkulungula Daavide bino shi: ‘Twe mulombeene kulwa na uno mwina Filistina. Okii nka mwana mukinga, kadi aye muntu mulwe ngoshi kubanga ku bukinga bwaye.’ Daavide balulwile shi: ‘Naadi mwipee kimungu na ntambwe pa naadi nalama mikooko ya nshaami. Uno mwina Filistina ekala bu yaya nyema. Yehowa akyebe kunkwasha.’ Byabya, Saule bambile shi: ‘Enda, Yehowa ekale noobe.’
Daavide balalele ku mwela aye nkusangula minono itano ya mabwe aye nkwiyela mu mpaaya. Kunyima aye nkwata mipila enda mu kufumankana na yawa mulume a kipambe. Nsaa ibamumwene Golyate tabakuminyine. Kwete kupwandikisha shi mbibofule bwa kwipaa Daavide.
Golyate bakwile shi: ‘Fika pano bwashi mpe tonyi twa mwiyilu na nyema ya mapya mwita oobe bu kya-kudya.’ Kadi Daavide bakwile shi: ‘Obe ofiki kwandi mukwate mwele, mulumbu na esola, ank’ami nafiki ndwe noobe mwishina dya Yehowa. Leelo uno Yehowa akutuulu mu maasa ande, nakyebe nkwipaa.’
Paapa Daavide bayiile lubilo kwi Golyate. Baatshile ebwe mu mpaaya, edyela mu mipila, na aye nkwidyela na bukome bwaye booso. Ebwe dibaashile Golyate ku mutwe, aye nkupona nkufwa! Nsaa ibamwene beena Filistina shi kilobo kyabo kibapono, abo booso nkwialuula nkusuuka lubilo. Beena Isaleele abebalondele na abo nkutshokola ngoshi.