Daavide tabaadi na moo nya

We mulombeene kukita kinyi nsaa yoodi na moo?— Pangi we mulombeene kusuukila kwi nyinobe sunga nshoobe bwashi akulamwine. Kadi kwi ungi muntu mulombeene nkulamwina. E na bukome bukile bantu booso. Ouku shi nnanyi?— Oolo, nyi Yehowa Efile Mukulu. Tubande kwisamba pabitale ungi songwalume abetanyina mu Bible bu Daavide. Baadi auku shi Yehowa amukwasha mu mishindo yooso, byabya tabaadi na moo nya.

Kubanga mafuku abaadi Daavide kii mwana tooka, baledi baaye abaadi abamulongyesha bya kufula Yehowa. Bino bibaadi bikwashe Daavide bwashi tekalanga na moo mpa na pabaadi mu nkalakasho. Baadi auku shi Yehowa baadi Kuuku aaye na mulombeene kumukwasha. Ungi mususa, nsaa ibaadi Daavide adiisha mikooko ku mwengye, ntambwe mukata nkufika na aye nkukwata mukooko! Ouku kibakitshine Daavide? Baadi mulonde ntambwe na abimweneka shi bamwipayile na maasa aaye! Na pabafikile kimungu mu kukwata mukooko, Daavide nkwikipaa! Opwandikisha shi nanyi baadi mukwashe Daavide?— Oolo, nyi Yehowa.

Kubaadi dingi efuku dibalesheshe Daavide shi e n’eshimba dinyingye. Beena Isaleele abaadi abalu ngoshi na mwilo wa Beena Filistina. Umune a ku basalayi ba beena Filistina baadi kipambe kya balume! Eshina dyaaye nyi Golyate. Uno kipambe baadi kwete kusabuula basalayi beena Isaleele mpa na Yehowa. Golyate ayipusha su kwi musalayi mwina Isaleele e bukome bwa kutuuka na kulwa naye. Kadi beena Isaleele booso abaadi na moo wa kulwa naye. Nsaa ibapushiishe Daavide pabitale wawa mwanda, balungwile Golyate shi: ‘Nakyebe kulwa noobe! Yehowa akyebe kunkwasha, na nakyebe nkwipaa!’ Opwandikisha shi Daavide baadi n’eshimba dinyingye su?— Oolo, baadi n’eshimba dinyingye ngofu. Okumiina kuuka kibaadi kikitshikye dingi?

Daavide nkwata mipila yaaye ya toonyi na mabwe a minono atano, na aye nkutuuka bwa kulwa na yawa mulume a kipambe. Golyate pabamwene bibaadi Daavide bukinga, babangile kusabuula Daavide. Kadi Daavide nkumulungula shi: ‘Obe ofiki kwandi mukwate mwele, ank’ami nafiki ndwe noobe mwishina dya Yehowa!’ Anka paapa, belele ebwe mu mipila yaaye ya toonyi, abanga lubilo dya kwi Golyate, na aye nkumwasa ebwe. Adjo nkutwela Golyate mu mpala! Kipambe nkupona, akyo nkufwa! Beena Filistina booso nkupalakana na abo nkusuuka. Mushindo kinyi ubapetele nsongwalume bu Daavide bukome bwa kwipa kyakya kipambe kya balume?— Yehowa baadi mumukwashe, na Yehowa e bukome kukila kyakya kipambe kya balume!

Kileshesho kya Daavide akitulongyesha kinyi?— Yehowa e na bukome bukile bantu booso. Na mmwikale Kuuk’oobe. Byabya ingi nsaa we mulombeene kutshiina, kadi tentekyesha shi, Yehowa mmulombeene nkukwasha bwa kwikala n’eshimba dinyingye!