Mwanda wa 64

Salomone ayibaka ntempelo

KUMPALA kwa kufwa, Daavide baadi mupe Salomone kifwatulo akilesha mushindo autungu kwibaka ntempelo bu bibaadi bileshe Efile Mukulu pabitale ntempelo aye. Mu kipwa kya kananka kya bufumu bwaye, Salomone babangile kwibaka ntempelo na baadi mumwibakye munda mwa bipwa musambobidi na kipindji. Na balume makumi a binunu abaadi bafube ku mudimo wa kwibaka ntempelo, kwibaka kwa ntempelo kubadiile makuta akile bungi, mwanda abaadi bemwele oòlò na byamo by’ebakanyi bibungi bukile.

Ntempelo baadi na tudimbo tukata tubidi, nka bu bibaadi tabernakele. Kadi twatwa tudimbo ntukile twatwa tubaadi mu tabernakele bukata misusa ibidi. Salomone baadi mutweshe musheete wa kilombeeno mu kadimbo ka mu ntempelo na bingi bintu bibaadi bilamibwe mu tabernakele mbebituule mu kangi kadimbo.

Pabaapu kwibaka kwa ntempelo, abakitshine feete mukata. Salomone bakunamine kumpala kwa ntempelo na abanga kuteka bu byokwete kumona mu kifwatulo. Salomone balungwile Yehowa shi: ‘Eyilu tandilombeene nkupetela mbalo, byabya anka ino nshibo yandi mu kwibakile ndyo ilombeene nkukumbana? Tee matwi ku nteko ya mwilo oobe nsaa yabatekye batadiile ku ino mbalo.’

Salomone pabapudisha kuteka, kaalo kabayikile mwiyilu. Ako nkushiika milambo ya nyema ibaabadi batushe. Na etaata dya ntumbo ya Yehowa dibaudile mu ntempelo. Bino bibaadi abilesha shi Yehowa baadi apusha na baadi musangeele nteko ya Salomone na ntempelo. Binobino kukaasha tabernakele, ntempelo baadi bu mbalo ibafikanga bantu bwa kulangwila.

Salomone baadi mukunkushe mwilo mu mushindo wibuwa munda mwa mafuku ebungi, na mwilo ubaadi na muloo. Kadi Salomone baadi mwibakile bakashi bebungi ba mu angi maumbo bashibaadi abalangwila Yehowa. Okwete kumona ungi a kwabadi kwete kulangwila nkishi su? Ku nfudiilo a byooso bakashi baaye abamukakile mu kulangwila namu baaba b’efile. Ouku kibakitshikile nsaa ibabangile Salomone kulangwila ma nkishi su? Tabaadi dingi akitshina mwilo myanda ibuwa nya. Baadi bukyelo mwilo taubaadi dingi na muloo nya.

Wawa mwanda ubafitshiishe Yehowa munda aye nkulungula Salomone shi: ‘Nakakunyengye bufumu nebupe ungi muntu. Anka ntanebikitshi pokii na muwa nya, nebunyengye mwana oobe. Kadi ntanyengye mwana oobe bufumu booso bushima nya.’ Tubande kutala byabibaadi bikitshikye.

1 Myanda 28:9-21; 29:1-9; 1 Banfumu 5:1-18; 2 Myanda 6:12-42; 7:1-5; 1 Banfumu 11:9-13.