Mwanda wa 63
Salomone nfumu sha binangu
SALOMONE kii na bipwa pepi na makumi abidi nsaa ibafiki bu nfumu. Mufule Yehowa na kwete kulonda malango ebuwa abamupeele nshaaye Daavide. Yehowa baadi musangale bikata mwanda wa Salomone na dingi efuku bamulungwile bino mu kilotwa: ‘Salomone, kyandya kukupa nkinyi?’
Paapa Salomone balulwile shi: ‘Yehowa Efile Mukulu ande, ami nkii nsongwalume ntangukile bya kumunana nya. Byabya mpe binangu bwa kukunkusha mwilo oobe kalolo.’
Yehowa basangala bikata pabitale bibamutekye Salomone. Yehowa nkwamba shi: ‘Bu bibotekye binangu na byoshi mwitekyele mafuku ebungi a muwa sunga bupeta, nakyebe nkupa tudindi na binangu bishapetele muntu buube. Kadi nakupa dingi mpa na kyoshi mutekye, nakupa bupeta na nkumo.’
Mu mafuku apela, baana bakashi babidi abafikile kwi Salomone na mwanda ukata. Umune a kwabadi bambile shi: ‘Ami na uno mukashi twibashale mu nshibo imune. Ne mutande mwana mulume, na mafuku abidi kunyima kwa kutanda kwande, uno mukashi mutande namu mwana mulume. Akupu dingi efuku bufuku mwana aaye nkufwa. Kadi panaadi munkatshy’a tulo, baladiishe mwana aaye mufwe pandi aye nkwata mwana ande. Ku namashika, panatala kalolo mwana mufwe, namono shi tangande nya.’
Paapa yawa mungi mukashi bakwile shi: ‘Nya! Mwana ande nguno atala, kadi mwana oobe ngyawa mufwe!’ Mukashi a kumpala balulwile shi: ‘Nya! Mwana oobe nguno mufwe, na mwana ande nguno atala!’ Bino ndjo bibaadi baba bakashi abekakeena. Salomone akyebe kukita kinyi?
Batumine eyi bwashi bende mu kukimba lupete, na pabafikile nalo, Salomone bambile shi: ‘Tshibayi yawa mwana atala mu bipindji bibidi nupe mukashi ooso kyaye kipindji.’
Nyina mwana a binyibinyi bambile shi: ‘Leka! Mupeyi mwana atala tanumwipanga nya!’ Kadi ungi mukashi bamba shi: ‘Tanumupanga muntu su ngumune a kwatudi; mutshibeyi mu bipindji bibidi.’
Ku nfudiilo Salomone bakwile shi: ‘Paayi mukashi a kumpala mwana atala. Tanumwipanga nya! Aye ndjo nyina mwana.’ Salomone baukile bino mwanda nyina mwana a binyibinyi baadi mufule mwana ngofu nyi bwakinyi baadi akumina shi bamupe yawa mungi mukashi bwashi tabamwipanga. Bantu pababapushishe mushindo ubaadi Salomone mutshibe wawa mwanda, abaadi na muloo wa kupeta nfumu ena binangu bi byabya.
Mu bufumu bwa Salomone, Efile Mukulu baadi mwelele mwilo mwabi, nsenga nkutuusha bya kudya bibungi: ntete ya bukula na bikuba. Bantu abaadi abafwala bilamba bibuwa na kushala mu mashibo ebuwa. Takubaadi muntu baadi akyenge nya.