Mushindo wi bana abashintuulaa dibaka

Kutandjikwa kwa mwana nkulombeene kwikala muloo na disanka dikile kwi ba mulume na mukashi. Bu byanudi shi nubafiki baledi bapya, nwi balombeene kukema p’anwe kumona shi nsaa yeenu na bukome bwenu bwibungi anwibikishiisha mu kutala kwa mwana kii tooka. Kukutwa kwa tulo pamune na kushintuluka kwa ngyelelo a bingangu nkulombeene kukalakasha kipwano kyenu. Anwe booso ba mulume na mukashi abitungu nukite mwenu mooso bwa kukalwila mwan’eenu kii tooka na kubamba dibaka dyeenu. Mushindo kinyi ulombeene malango a mu Bible kwinukwasha bwa kupudisha yaaya nkalakasho?

1 SHINGUULA KALOLO MUSHINDO WI MWANA ASHINTUULA NSHALELO EENU

AKYAMBA BIBLE: “Kifulo kii na lwishinko, kifulo akikwashanaa.” Na dingi, “kifulo takikimbaa mwabi wa buupenka, taakikwata nsungu.” (1 Beena-Kodinto 13:4, 5) Bu bibofiki nyina mwana, binangu byoobe abikamba kwimeena nka pa mwana oobe. Byabya, mulume oobe mmulombeene kubanga kupusha bu’be bamusumbusheena, anka tolubanga shi n’aye naamu e na lukalo lwa shi omutala namu. Na lwishinko na kalolo kooso, we mulombeene kumukwasha bwashi eepushe shi we naye lukalo na shi e na mudimo ukata mu kukusha kwa mwan’eenu.

“Anwe balume . . . shaalai na bakashi beenu na binangu.” (1 Mpyeele 3:7, Kilombeno kipya) Shinkamisha kalolo shi mukashi oobe kwete kufuba ngofu bwa mwana. Nyi mbushito bupya na mbulombeene kumukalakasha, kumufiitshisha munda sunga kumukokyesha. Ingi nsaa mmulombeene nkufiitshila munda, kadi banda kumiina, mwanda “sha lwishinko ee na muulo ukile wa kimankinda.” (Myeele 16:32) Leesha kapatupatu, na omukwashe pakudi mushindo.​—Myeele 14:29.

KYODI MULOMBEENE KUKITA

• Nshe mwana: Kwasha mukashi oobe bwadya kutabalela mwana, sunga mbufuku. Peelesha nsaa y’okishanga ku ingi myanda bwashi okishe nsaa ibungi na mukashi oobe na mwana

• Nyina mwana: Nsaa i mulume oobe akukwasha na mwana, kumiina bukwashi bwaye. Su t’alombasha kalolo mufubo ubakitshi, tomufukuulanga, kadi na kalolo kooso muleeshe mushindo wadya kwiukita

2 NYINGISHAAYI KIPWANO KYENU

AKYAMBA BIBLE: “Abakekala mbidi imune.” (Kibangilo 2:24) Sunga mbyabya nubapete muntu mupya mu kifuko kyeenu, tentekyesha shi obe na mwina dibaka noobe nwi nka “mbidi imune.” Kita bukopo bobe booso bwashi kipwano kyenu kishaale nka kinyingye.

Bakashi, ikalayi na lutumbu ku bukwashi bwa balume beenu. Bishima byoobe bya kukanyisha mulume oobe mbilombeene “kupaasha.” (Myeele 12:18) Balume, lungulayi bakashi beenu mushindo wanudi bebafule na kwibaata na muulo. Ebatumbisheeyi pabitale mushindo wabakwete kutabaleela kifuko.​—Myeele 31:10, 28.

“Muntu takimbanga akimulongamina’nka aye nabeene nya, anka akilongamina ungi.” (1 Beena-Kodinto 10:24) Misusa yooso kitshina mwina dibaka noobe myanda ibuwa. Bu byanudi ba mulume na mukashi, atayi nsaa ya kwisamba, kwilangeena, na kwiteemesheena ku muntu na muntu. T’abitungu kwisangasha nka obe nabeene pabitala kipwano kyenu kya kusangisha mbidi nya. Taluula bi nkalo ya mwina dibaka noobe. Bible akula shi: “Mulume tashilanga mpyan’ê mu nshibo, sunga mukashi namu kushila mulund’ê.” (1 Beena-Kodinto 7:3-5, EEM) Byabya esambeeyi pamune wawa mwanda wi pankatshi peenu kalolo. Lwishinko lwenu na mpushisho eenu ebuwa abikyebe kunyingisha kipwano kyenu.

KYODI MULOMBEENE KUKITA

• Tanukumanga kwilwankana kwata nsaa bwashi nubande kushaale bubidi bwenu

• Kita tu bintu tupeela bwashi mwina dibaka noobe apushe shi mbanfule, bu kumutumina tu mesaje sunga kumupa tu kado tupeela

3 LONGYESHAAYI MWANA EENU

AKYAMBA BIBLE: “Byatshiile ku bukinga boobe booso, ouku bifundwe biselele: bii na matalwa a nkupa kyuukilo akifishanaa ku kipandjilo.” (2 Timotee 3:15) Ata mpàngo ya kyokyebe kulongyesha mwana oobe kii tooka. E na mushindo wa kulonga, kubaanga pa kii mwifu. Na dingi, pa kii munda, mwana eenu mmulombeene kutundula eyi dyoobe na nkukookyela. Mubadikile mikanda pakii mukinga ngofu. Sunga mbyabidi shi ta mulombeene kubanda kupusha byokwete omubadikila, mbilombeene kumukwasha bwashi ekale asankila kubala nsaa y’akulu.

Mwan’eenu ta mukinga bwa kukutwa kwinupusha nsaa yanwakula myanda itale Efile Mukulu nya. Teka mu mushindo washi n’aye namu apushe nsaa y’otekye Yehowa. (Miiya Ikituulwe 11:19) Sunga nsaa yanwasha pamune, esambeeyi pabitale bintu byabadi bapangye kwi Efile Mukulu. (Misambo 78:3, 4) Bu bi mwan’enu kwete kwenda na kukula, akyebe kipusha mushindo wanudi bafule Yehowa na akyebe kulonga bwa kumufula naaye namu.

KYODI MULOMBEENE KUKITA:

• Teka nka penda binangu kwi Yehowa bya kukusha mwan’oobe kalolo

• Kwambulwila mwan’oobe bishima bii na muulo akukyebe kumukwasha bwa kubanga kulonga pa kii mukiinga