Mushindo wa kulongyesha mwana oobe

Pabaadi Yehowa mupangye mpàngo itale kifuko, baadi mupe baledi bushito bwa bana baabo. (Beena-Kolose 3:20) Kulongesha kwa bana bwa kufula Yehowa na kwibakwasha bwa kwikala bantu bakulu banyingye nyi mudimo w’anwe baledi. (2 Timotee 1:5; 3:15) Abitungu nubande kulonga dingi ki mwishimba dya mwan’eenu. Na dingi, bana abalondo kileshesho kyeenu. Bwa kulambukisha mwana oobe Eyi dya Yehowa kalolo, we mulombeene kubanda kwiditwesha mwishimba dyoobe’be nabeene.​—Misambo 40:8.

1 KWASHA BANA BOOBE BWASHI BEKALE ABAKULUNGULA MYANDA

AKYAMBA BIBLE: ‘Ikala na kupusha kwa bukidi, anka eyeeshe mu kwakula.’ (Jaake 1:19) Lukalo loobe ndwa shi, bana boobe bapushe shi be mu bulungantu bwa kukulungula myanda kushii moo. Abitungu baukye shi w’ebateemesha kalolo nsaa yabadi na lukalo lwa kwisamba noobe. Kimba bya kutwesha butaale, byabya abamono shi mbibofule bwabadya kuleesha bi mu mashimba aabo. (Jaake 3:18) Su abamono shi okyebe kwibakitshisha myanda pa bukopo sunga bu’be ebasambisha, mbalombeene kupela nkulungula myanda yooso. Ikala na lwishinko kwi bana boobe, na misusa yooso ebashinkamiishe shi we mwibafule.​—Mateo 3:17; 1 Beena-Kodinto 8:1.

KYODI MULOMBEENE KUKITA:

• Teemesha bana boobe nsaa yabakyebe nkulungula myanda

• Ikala wesamba na bana boobe misango yooso, ta nka penda pabadi na mwanda nya

2 ETATSHISHE BWA KUSHINKAMISHA KYABAKYEBE KWAKULA

AKYAMBA BIBLE: “Anangusheena ngofu ku kipwandjikiile kukita, eekala kalolo.” (Myeele 16:20) Ingi nsaa, we na lukalo lwa kumona kula pabitale bishima bya bana boobe, sunga kupusha bi nkalo yabo. Misusa ibungi, bana abakishakishaa mu kwakula sunga kwakula bwakulakule. “Aaluula kumpala kwa kuteemesha mmupatakane.” (Myeele 18:13) Tofitanga munda bukidi.​—Myeele 19:11.

KYODI MULOMBEENE KUKITA:

• Ata kitshibilo kya kupela kumutshiba mwanda sunga kumutombokyela

• Tentekyesha biboodi opusha p’oboodi na bipwa bu byaye

3 IKALAYI MU BUUMUNE

AKYAMBA BIBLE: “Mwan’ande, lama abikulambukisha nshoobe, tolenguulang’elango dya nyinoobe.” (Myeele 1:8) Yehowa baadi mupe baledi booso babidi matalwa a kukunkusha bana baabo. Abitungu obande kulogyesha bana boobe bwa nkunemeka na nkukookyela. (Beena-Efeeze 6:1-3) Bana mbalombeene kushinguula su baledi baabo ta be mu “bumune bwa mu . . . kinangu.” (1 Beena-Kodinto 1:10) Su tanwibepusheene pa mwanda kampanda, tokumanga kwibileesha munkatshi mwa bana mwanda bino mbilombeene kupeelesha kineemo kya bu baledi.

KYODI MULOMBEENE KUKITA:

• Esambeeyi pamune na nusangule mushindo wanukyebe kulanga bana beenu

• Su nwina mmweneno a myanda mwilekeene na mwina dibaka noobe mu mushindo wa kulanga bana beenu, banda kutompa kutaluula kalolo bi mmweneno a mwina dibaka noobe

4 ATA MPÀNGO

AKYAMBA BIBLE: “Lambukisha mwana bwikashi bwibuwa pa kii mukinga.” (Myeele 22:6) Kukusha kwa mwana mwishinda dibuwa ta nkulombeene kwifwila nka byabya nya. We na lukalo lwa kulumbuula myanda ya kumulongyesha, mbitale mpa na kunyooka kwa mwan’oobe. (Misambo 127:4; Myeele 29:17) Kunyooka t’akuleesha penda kumukupila nya, kadi akuleesha kukwasha bana boobe bwa kupusha kalolo bwakinyi webeelela miiya. (Myeele 28:7) Ebalongyeshe dingi bwabadya kufula Eyi dya Yehowa na kunangusheena miiya yaaye. (Misambo 1:2) Bino abikyebe kwibakwasha bwabadya kwikala na kondo k’eshimba kebuwa.​—Beena-Ebreeyi 5:14.

KYODI MULOMBEENE KUKITA:

• Longyesha bana boobe bwa kumona Efile Mukulu bu Muntu abinyibinyi a kukulupila

• Ebakwashe bwa kutundula na kusuuka masaku a mu nshalelo, bu ku Internet, sunga mu mushindo wa kwisamba na bantu bebungi mususa umune ku Intenet. Ebalongyeshe bwa kusuuka lusandji