Pushisha Efile Mukulu bwa kwikala na muloo mu dibaka

Yehowaa Efile Mukulu ndjo baadi mubungye ba mulume na mukashi ba kumpala mu dibaka. Bible etulungula kintu kibaadi mupangye nakyo mukashi a kumpala na ‘nkufika naye kwi mulume.’ Adame baadi na muloo ukile paaye kwamba shi: “Uno nyi mufufwa wa ku mifufwa yande na mbidi ya ku mbidi yande.” (Kibangilo 2:22, 23) Yehowa akuminaa nka shi bantu beyibakisheene bekadikye na muloo.

Nsaa y’otwele mu dibaka, we mulombeene kupwandjikisha shi myanda yooso ngipwidikye. Kwakula kwa binyibinyi, sunga mulume na mukashi mbefuleene ngofu nkulombeene kwikala nka tungi tu myanda. (1 Beena-Kodinto 7:28) Mu uno broshire, okyebe kupeta mayi akata a kulonda a mu Bible, su weatumikila, we mulombeene kutwesha muloo mu dibaka na mu kifuko kyoobe.​—Misambo 19:8-11.

1 LOMBASHA MUDIMO UKUPE YEHOWA

AKYAMBA BIBLE: Mulume nyi mutwe wa kifuko. ​—Beena-Efeeze 5:23.

Su we mulume, Yehowa akutekye bwashi okalwile mukashi oobe na kalolo kooso. (1 Mpyeele 3:7) Abaadi bamupangye bu mukwashi oobe, na akumiina shi omukitshiine myanda na kinemo kyooso na kifulo. (Kibangilo 2:18) Abitungu obande kufula mukashi oobe ngofu p’obe kukumiina kutuula myanda yaaye pa mbalo ya kumpala.​—Beena-Efeeze 5:25-29.

Su we mukashi, Yehowa akutekye bwa kunemeka mulume oobe ngofu na kumukwasha bwadya kulombasha mudimo waye. (1 Beena-Kodinto 11:3; Beena-Efeeze 5:33) Mukwatshisheene mu bitshibilo byata na nufube mu buumune na mashimba eenu ooso. (Beena-Kolose 3:18) Su bokitshi byabya, wekadika muntu e buwa bukile kumpala kwa mulume oobe mpa na kwa Yehowa.​—1 Mpyeele 3:1-6.

KYODI MULOMBEENE KUKITA:

• Ipusha mwina dibaka noobe mushindo oodi mulombeene kwikala mulume sunga mukashi ebuuwa. Muteemeshe kalolo, na okite kyooso kyodi mulombeene kukita bwa kulongamisha

• Ikala na lwishinko. Abitungu mafuku ebungi bwashi ooso a kwanudi alongye mushindo wa kusangasha mukwabo

2 LOMBASHA NKALO YA MWINA DIBAKA NOOBE KALOLO

AKYAMBA BIBLE: Abitungu obande kutuula myanda ayisangasha mwina dibaka noobe kumpala. (Beena-Fidipe 2:3, 4) Ikala na muloo wa mwina dibaka noobe, otentekyeshe shi Yehowa atekye bafubi baaye bwa ‘kwikala bibuwa na bantu booso.’ (2 Timotee 2:24, EEM) “Myanda ya bwakulakule ngilombêne kutapa muntu bu lupete lwa ngoshi, anka ludimi lwa basha binangu nyi ndubuko lukata.” Byabya sangula bishima byoobe kalolo. (Myeele 12:18, NWT) Kikudi kya Yehowa nkilombeene nkukwasha bwa kwisamba na kalolo kooso na kifulo.​—Beena-Galate 5:22, 23; Beena-Kolose 4:6.

KYODI MULOMBEENE KUKITA:

• Teka bukwashi bwa kushaala mumiine na bwa kwikala na binangu bibuwa kumpala kwa kwisamba myanda i na muulo na mwina dibaka noobe

• Nangusheena kalolo pabitale kyokyebe kwakula na mushindo okyebe kwakula

3 NANGUSHEENAYI PAMUNE

AKYAMBA BIBLE: Nsaa y’anwiyibakisheena, nubafiki “mbidi imunenka” na mwina dibaka noobe. (Mateo 19:5) Kadi nwinka bantu babidi na nwibalombeene kwikala na mmweneno mwilekeene. Byabya abitungu nulongye bwa kwikala mu buumune mu binangu na mu nkalo yeenu. (Beena-Fidipe 2:2) Buumune bwi na muulo nsaa yanwata bitshibilo. Bible amba shi: “Mu milango ya bantu bebungi, we mulombeene koobesha myanda.” (Myeele 20:18, NWT) Tadiilayi mayi a kulonda a mu Bible enukukunkushe nsaa yanwata bitshibilo bikata pamune.​—Myeele 8:32, 33.

KYODI MULOMBEENE KUKITA:

• Lungula mwina dibaka noobe bi nkalo yoobe, ta nka penda mwanda oobe oodi nawo sunga byopwandjikisha

• Esambe na mwina dibaka noobe kumpala kwa kwata kitshibilo