KIPINDJI 2
Ikala na bulamate kwi mwina dibaka nobe
“Kiakia kibababuungu kwi Efile Mukulu muntu tekilamuunanga.”—Maako 10:9, Kilombeno kipya 2009
Yehowa etutekye bwa “kufula bulamate.” (Mika 6:8) Bino bi na muulo ukile bikishekishe mu dibaka dyoobe mwanda su ta kwi bulamate, takwi lukulupilo. Na lukulupilo lwi na muulo bwashi kifulo kitame.
Lelo uno, bi bukopo bwa kwikala na bulamate mu dibaka. Bwashi okalwile dibaka dyoobe, abitungu obande kwata kitshibilo kya kukita ino myanda ibidi.
1 TUULA DIBAKA DYOOBE PA MBALO YA KUMPALA
AKYAMBA BIBLE: ‘Shinguula kikile byooso ku buuwa.’ (Beena-Fidipe 1:10) Dibaka dyoobe nyi nkintu kimune kii na muulo ukata mu muuwa oobe. Abitungu kwidituula pa mbalo ya kumpala.
Yehowa akumiina shi wepaane ngofu kwi mwina dibaka noobe na ‘nusankye’ efuku dyooso pamune. (Mulungudi 9:9) Aleesha patooka shi twe kulenguula mwina dibaka noobe efuku su ndimune kadi, pamutwe pa byabya, anwe booso nwi kukimba mishindo yanudya kwisangasheena ku muntu na muntu. (1 Beena-Kidinto 10:24) Abitungu mwina dibaka noobe apushe shi we naye lukalo na kumukanyisha.
KYODI MULOMBEENE KUKITA:
Shinkamisha shi nukwete kukisha nsaa yooso pamune, okwete kutabaleela mwina dibaka noobe n’eshimba dimune.
Ikala onangusheena mu “atwe” pamutwe pa “ami”
2 BAMBA ESHIMBA DYOOBE
AKYAMBA BIBLE: “Ooso atala mukashi na lwabi mmupwe kutambuka naaye mwishimba dyaaye.” (Mateo 5:28) Su muntu kwete kunangusheena ku bintu bi butete, mu ungi mushindo, mmukutwe kishima kwi mwina dibaka naye.
Yehowa amba shi abitungu ‘kubamba eshimba dyoobe.’ (Myeele 4:23; Yeelemiiya 17:9) Bwa kwibilombasha, abitungu obande kulama meeso oobe. (Mateo 5:29, 30) Londa kileshesho kya Yoobo, aye baadi mudye kipwano na meeso aaye kya kuleka kushimika meeso na lukalo kwi nsongwakashi. (Yoobo 31:1) Ata kitshibilo kya kupela kutala pornografi mususa sunga ngumune. Na ata kitshibilo kya kupela kukita myanda ilombeene kwibwesha lukalo kwi muntu shii mwina dibaka noobe.
KYODI MULOMBEENE KUKITA:
Lesha patooka shi we mulamate kwi mwina dibaka noobe.
Taluula bi nkalo ya mwina dibaka noobe, na otshibe musango umune makuuku alombeene kukalakasha mwina dibaka noobe