KIPINDJI 3
Mushindo wa kupudisha bilumbu
“Ikalaayi . . . na kifulo kii kapu munkatshi mwenu, mwanda kifulo akishimankishaa milwisho iibungi.”—1 Mpyeele 4:8
Bu byanudi obe na mwina dibaka noobe nubabanga nshalelo a pamune, bilumbu bibungi mbilombeene kutuuka. Mbilombeene kutuuka mwanda wa kwilekeena kwa mushindo aunangusheena ooso a kwanudi, byapusha, na myanda yaadi mufumankane nayo mu muuwa waye. Sunga shi, myanda ngilombeene kutuukila kungi; na nsaa na myanda yabash’abatengyela ayifwilaa bantu booso.
Mbilombeene kwikala bu mutompo ukata nsaa y’atwepe myanda, kadi Bible etulanga bwashi tukimbe bya kupudisha myanda. (Mateo 5:23, 24) We mulombeene kupudisha bilumbu byoobe kalolo nsaa y’olondo mayi a kulonda a mu Bible.
1 ESAMBEEYI WAWA MWANDA PAMUNE
AKYAMBA BIBLE: ‘Kwi . . kipindji kya kwisamba.’ (Mulungudi 3:1, 7, EEM) Shinkamisha shi okwete kukisha nsaa ibungi bwa kwisamba pabitale mwanda wanudi nawo. Leesha mwina dibaka noobe kalolo byopusha sunga byopwandjikisha pabitale wawa mwanda. Misango yooso ‘lungula mwinoobe bya binyibinyi.’ (Beena-Efeeze 4:25) Sunga kwekala mwanda wibukata bwi naminyi tokumanga kulwa naye ngoshi. Lwalulo lutaale ndulombeene kukwasha bwa kulama mwisambo pamutwe pa kwibwesha ngoshi.—Myeele 15:4; 26:20.
Leesha kaneemo sunga byekala shi tanwibepusheene, tokumanga kwilwankana kuleesha mwina dibaka noobe kaneemo na kifulo. (Beena-Kolose 4:6) Kimba bya kupudisha mwanda bukidibukidi pa ku kii nsaa, na tanukumanga kwishimbeena miima.—Beena-Efeeze 4:26.
KYODI MULOMBEENE KUKITA:
Kimba nsaa ilombeene kwisamba wawa mwanda
Nsaa i mwina dibaka noobe kwete kwakula, tokumanga kumutshiba mwisambo. Yoobe nsaa yodya kwakula ikii kumpala
2 TEEMESHA NA OPUSHE
AKYAMBA BIBLE: “Ikalayi n’eshimba dya kwileleena muntu na mwinaye . . .; ku mwanda wa kaneemo, nwikale’nwe bakwibedi kwikakitshina bangi bantu.” (Beena-Looma 12:10, Kilombeno kipya 2009) Mushindo oteemesha wi na muulo ukata. Tompa kupusha bi mweneno a mwina dibaka noobe “n’eshimba dimune . . . na kwipêlesha.” (1 Mpyeele 3:8, EEM; Jaake 1:19) Tokumanga kuleesha bu’be kwete kupusha aku namu tokwete kupusha. Su kwi mushindo, leka kyokwete kukita na oteemeshe mwina dibaka noobe na kalolo kooso, sunga kumuteka bwashi nwisambe wawa mwanda kumongo. Su omono mwina dibaka noobe bu mufubi noobe kushii kumumona bu mwishikwanyi noobe, twekala na mushindo wa ‘kukwata nsungu bukidi” nya.—Mulungudi 7:9, EEM.
KYODI MULOMBEENE KUKITA:
Tungunuka na kuteemesha kalolo, sunga wawa mwanda wopusha taukusankisha
Teemesha bwa kupusha mwanda ufwame mu mayi aakula. Tala mwina dibaka noobe byasanyisha mbidi na bukata bw’eyi dy’esamba nadyo
3 LOMBASHA BITSHIBILO
AKYAMBA BIBLE: “Mudimo ooso autuusha kipeta kiibuuwa, anka kubalakana akufishanaa penda ku mpombo.” (Myeele 14:23) Kwata kitshibilo kibuuwa ta nkupwa kwa mwanda nya. Abitungu nulombashe bitshibilo byenu byooso. Bino mbilombeene kutunga shi nukite mufubo wibukopo na kwitatshisha ngofu, anka anukapete efuto. (Myeele 10:4) Su anufubu booso pamune, anukapete “efuto dikumbane” bwa mufubo wenu wi bukopo.—Mulungudi 4:9.
KYODI MULOMBEENE KUKITA:
Atayi kitshibilo kya matabula anudya kukita bwa kupudisha myanda ayinukwata
Ku nsaa na nsaa, talulayi myanda ibanulumbuula