Mwanda wa 67

Yosafate atuulu lukulupilo mwi Yehowa

OUKU bano bantu na kya bakwete kukita su? Bakwete kwenda mu ngoshi, na bano bantu be kumpala kwabo bakwete kuyimba. Kadi we mukumbeene kwiyipusha bino: ‘Bwakinyi bano abayimbi ta be na myele na milumbu ya kulwa nayo?’ Tubande kutala akikyebe kukitshika.

Yosafate nfumu a bisamba bibidi bya mu Isaleele. Baadi na muwa mu mafuku a Akabe nfumu a bisamba 10 bya kunundu bya Isaleele na mukashi aaye Yezabele. Kadi Yosafate nfumu ebuwa, nshaaye Asa baadi namu nfumu ebuwa. Byabya munda mwa bipwa bibungi mwilo wa mu bisamba bibidi bya kuushi ubaadi na nshalelo ebuwa.

Kadi binobino kubamweneka kintu kampanda kibaapa bantu moo. Bantu abafikile mu kuukisha Yosafate shi: ‘Kisaka kikata kya bantu kibakatukila mwiumbo dya Moabe, Aamone na ku Myengye ya Seyiire kikwete kufika mu kulwa noobe.’ Beena Isaleele bebungi abebungile mu Yeelusaleme bwa kuteka bukwashi bwa Yehowa. Abende ku ntempelo, kwakwa Yosafate babanga kuteka bino shi: ‘Yehowa Efile Mukulu eetu etukalwile mwanda tatwi na bukome kumpala kwa kino kisaka kikata akifiki mu kulwa neetu. Tubakutwa kya kubanga. Twi bakulupile koodi.’

Yehowa bapusha luteko lwaye, batumu mufubi aaye umune bwa kulungula mwilo shi: ‘Ino ngoshi tangyenu nyi ngy’Efile Mukulu. Tanulwanga nabo ngoshi. Nwimane paapa nwilongye, anumono abikyebe kwinupaasha Yehowa.’

Byabya pabubatooko Yosafate balungwile mwilo shi: ‘Kulupilayi kwi Yehowa!’ Batudile bantu bwashi bekale abende na kuyimba kumpala kwa basalayi, nsaa yabaadi bakwete kwenda, abaadi abend’abasamunanga Yehowa. Ouku kibakitshikile nsaa ibabefubwile pepi na mbalo ya ngoshi su? Yehowa bakitshine bwashi baba basalayi ba beshikwanyi beyipayishene. Nsaa ibafikile beena Isaleele, abasangene basalayi booso mbafwe!

Yosafate baadi na binangu nsaa ibaadi mutuule lukulupilo lwaye mwi Yehowa su? Atwe namu su tubatuulu lukulupilo lwetu Mwadi, atulesha shi twi na binangu.

1 Banfumu 22:41-53; 2 Myanda 20:1-30.