Yehowa akaluila Yosafate

Yosafate nfumu a mu Yunda baadi muluiishe bilambuilo bia Baale na ma nkishi muiumbo. Baadi akumiina’shi bantu baukie miya ya Yehowa. Baadi mutume ba nfumu na bena Levi mu Yunda bua kulambukisha bantu miya ya Yehowa.

Miilo ibaadi iifunyishe Yunda ibaadi ayitshinyi kuibaluisha ngoshi muanda ibaukanga’shi Yehowa baadi na bafubi baaye. Abaadi mpa na batuadile Nfumu Yosafate bia buntu. Anka bena Moabe, bena Amone na baaba abaadi mu muengie wa Seyire abafikile bua kulua na Yunda. Yosafate bamuene’shi baadi na lukalo na bukuashi bua Yehowa. Baadi mubungie balume, bakashi na bana boso buabadia kuenda mu Yelusalema. Kumpala kua bantu boso baadi mutekie’shi: ‘Yehowa, tatui balombene kutshokola kushii’be nya. Etulungule namu kia kukita.’

Yehowa nkualuula luteko luabo’shi: ‘Tanutshiinanga. Nakiebe kuinukuasha. Shalaayi bemane, nuilongie bua kumona biankiebe kuinupaasha.’ Yehowa baadi muibapaashe naminyi?

Butookie namashika, Yosafate nkusangula ba tuyimba, aye nkuibalungula bua kutambuka kumpala kua basalayi. Abatambukile kubanga ku Yelusalema mpa na ku mbalo ya kuluila ngoshi yabetanyina bu Tekoa.

Pabaadi apende tuyimba na kutumbisha Yehowa na muloo n’eyi dikaamine, Yehowa baadi muluile bafubi baaye ngoshi. Baadi mutueshe kafuutakanyi munkatshi mua bena Moabe abo nkubanga kuitapeena, takubaadi su ngumune a kuabadi bapandile. Kadi Yehowa baadi mukaluile bantu ba mu Yunda, basalayi na ba tshiite muakuidi. Bantu booso ba mu maumbo ebeefunyishe abapushiishe bibaadi Yehowa mukite, abo nkushinguula’shi Yehowa kia kaluila bafubi baaye. Yehowa kuete kupaasha bafubi baaye naminyi? Mu bipaso bibungi. Te na lukalo lua bukuashi bua bantu bua kuibikita nya.