Mwanda wa 70

Yoona na mushipa ukata

TALA uno muntu e mu mema. E mu masaku akile, ta nabyo su? Uno mushipa aukyebe kumumina! Ouku eshina dya uno muntu? Eshina dyaye nyi Yoona. Tubande kutala mushindo ubamufwiila bino byooso.

Yoona nyi mutemuki a Yehowa. Mafuku apeele kunyima kwa lufu lwa mutemuki Elisee, Yehowa balungula Yoona shi: ‘Ebwe wende ku Niniive, lupata lukata. Bubi bwalo mbukile bukata, na nankyebe shi webaukishe byabya.’

Kadi Yoona takumina kwenda nya. Batwele mu mashuwa aende ku lungi lupese, kushi ku Niniive. Yehowa tamusangale bu bibasuuku Yoona nya. Byabya belesha kipapi ki bukopo. Kipapi kibaadi kikile bukopo na mashuwa abaadi pepi na kwiyina mu mema. Beena mashuwa be na moo ukile, na ababanga kwidila kwi b’efile baabo.

Akupu Yoona bebalungula shi: ‘Nalangwilaa Yehowa, Efile Mukulu bapangile nsenga n’eyilu. Na dingi nkwete kusuuka bwa kupela kukita bibaadi Yehowa mundungule.’ Ndjo beena mashuwa nkumwipusha shi: ‘Tukite kinyi bwa kwimika lupapi?’

Yoona nkwamba shi: ‘Ngyeleyi mu mema, na mema aakyebe kubatama.’ Beena mashuwa tambakumine kumwela mu mema nya, kadi pabakidile kipapi bukopo abelele Yoona mu mema. Paapa kipapi kibatshibikile, na mema ababatamine.

Nsaa ikwete Yoona kwiyina mu mema, mushipa ukata ubamuminyi. Kadi tamufwe nya. Munda mwa mafuku asatu, bufuku na kanya, Yoona e nka mwifu dya mushipa. Yoona benyongola ngofu bu byashi mukokyele Yehowa na kwenda ku Niniive. Ouku kibakitshine su?

Yoona baadi atekye Yehowa bwashi amukwashe. Paapa Yehowa nkutuma mushipa bwaudya kulasa Yoona ku kyeese. Akupu Yoona bayile ku Niniive. Uno mwanda tawitulongyesha shi bibuwa kukita kyooso akyamba Yehowa su?

Mukanda wa Yoona 1-4.