Yehowa baadi muleeshe Yona luishinko

Bantu abaadi na muikeelo wibubi mu Asiri mu kibundi kia Ninive. Yehowa nkulungula mutemuki aaye Yona bua nkebadimusha bua kushintuula muikeelo wabo. Kadi Yona basukile ku lungi lupese. Aye nkuata mashuwa abaadi aende ku Tarsise, aye nkuenda nao.

Pabadi mashuwa mu mema, kubelele kipapi kikata, kibaadi kikuatshishe bantu moo. Abatekiele b’efile baabo na kuibeepusha’shi: ‘Buakinyi muanda wi bino?’ Nfudiilo a bioso, Yona bebalunguile’shi: ‘Nnami e na muanda. Nkuete kusuuka kuabekeele bantume kui Yehowa. Ntentuleeyi nungiele mu mema bua’shi abatame.’ Bantu abaadi abatambusha mashuwa tababaadi abakumiina kusumbula Yona, aye nkuibashishikila. Pababaadi bamuele mu mema, kipapi kibalekiele.

Yona nkumona shi kuaye kubaapu. Pabaadi muisankamikie abanga kuiyina mu mema, belele luteko kui Yehowa. Akupu Yehowa nkutuma mushipa ukata. Ao nkumina Yona, kadi kushi kumuipaa. Munda mua mushipa, Yona belele luteko’shi: ‘Natshipi’shi nekala’nka nakukookiela misango yooso.’ Yehowa baadi mulame Yona na muwa munda mua mushipa mafuku asatu, akupu aye nkutakula mushipa buaudia kumulasa ku kiese.

Sunga biekala’shi Yehowa baadi mupaashe Yona, abileesha’shi tabaadia kuenda dingi ku Ninive? Nya. Yehowa balunguile dingi Yona bua kuenda kuanka. Wawa musango, Yona baadi mukookiele. Aye nkuenda mu kulungula baaba bantu babi’shi: ‘Ababutula Ninive mu mafuku 40.’ Ako nkukitshika muanda wa kukaanya, bena Ninive nkupusha mukandu waye, abo nkushituula muikeelo wabo. Akupu nfumu a bena Ninive nkulungula muilo waye’shi: ‘Muntu ooso eelangie kui Efile Mukulu. Pangi t’etubutula nya.’ Pabamuene Yehowa’shi bena Ninive babelangile kuishimba, tabaadi muibabutule nya.

Yona baadi mufiite munda muanda tababaadi bebatule. Banda kuela binangu: Yehowa bakatukile mu kuleesha Yona luishinko, kadi Yona tabaadi mufuile bena Ninive lusa nya. Pa muanda wa biabia, bayile akashaala paasha pa lupata muushi mua mulundo wa ngenete. Akupu keenyi ka mulundo kabaumine, Yona nkunyiisha kufiita munda. Yehowa nkumulungula’shi: ‘Wenyongola bua uno mulundo kukila bua bena Ninive. Nebafuila lusa bua’shi bapande.’ Nkinyi kibaadi na muulo? Bena Ninive abaadi na muulo kukila mitshi yoso.