Mwanda wa 71

Efile Mukulu alaa Mpaladiiso

TALA kifwatulo kya mpaladiiso bu bibaadi Efile Mukulu muleshe mutemuki Yeeshaya. Yeeshaya baadi na muwa mafuku apela kunyima kwa Yoona.

Kishima mpaladiiso akilesha “lupango” sunga “efuba.” Abikutentekyesha kingi kintu kyatwikalanga bamone mu uno mukanda su? Akimweka bu lupango lwibuwa lwa Edene mubaadi Yehowa mutuule Adame na Eeva su? Kadi nsenga ishima ngikumbeene kwikala mpaladiiso?

Yehowa balungwile mutemuki aaye Yeeshaya bwashi afunde pabitale mpaladiiso mupya akafiki bwa bafubi b’Efile Mukulu. Bambile shi: ‘Museu aushaala pamune na mwana a mukooko. Mwana a ngombe na ntambwe mwana abadiila pamune, mwana mukinga eyitantasha. Mpa na mwana mukinga ashila pepi na nyoka a nsubu.’

Bantu bebungi mbakumbeene kwamba shi: ‘Bino ta mbikumbeene kukitshika nya. Kubanga kala, nkalakasho i pa nsenga, na dingi ayikekala kwanka.’ Kadi banda kwela binangu: Efile Mukulu batudile Adame na Eeva mu mbalo ya mushindo kinyi?

Efile Mukulu batudile Adame na Eeva mu mpaladiiso. Abaadi bashimishe mpaladiiso pa mwanda wa kukutwa kwabo kwa kukokyela, na dingi abaadi banunupe na abafwile. Efile Mukulu etulaa shi akyebe kupa bantu bamufule bintu byooso bibaadi Adame na Eeva bashimishe.

Mu mpaladiiso mupya takwi kintu su nkimune kikumbeene kutapa sunga kwipa muntu. Akukekala kufukama kwa binyibinyi. Bantu booso abakekala na mbidi bukome na muloo. Abikekala nka bibakyebele Efile Mukulu ku mbangilo a byooso. Kadi atukamono mushindo aukyebe Efile Mukulu kwibikita.

Yeeshaya 11:6-9; Bifumbulwe 21:3, 4.