Mwanda wa 79

Danyele mu bwina bwa ntambwe

TALA! Abimweneka shi Danyele e mu masaku akata. Kadi ntambwe ta ngi musume nya! Ouku shi mbwa kinyi! Nanyi beele Danyele mu buno bwina bwa ino ntambwe? Tubande kutala.

Daryuse nyi taadi nfumu mupya a mu Babilone. Mufule Danyele ngofu mwanda muntu ebuwa na sha binangu. Daryuse basangula Danyele bwashi ekale mukunkushi mukata mu bufumu bwaye. Pa wawa mwanda bangi bantu ba mu bufumu abakwatshila Danyele kiutu, binobino tala bibabakishine.

Abayile mu kulungula Daryuse shi: ‘Mwanana, twi baate kitshibilo shi wele mwiya bwashi munda mwa mafuku 30 muntu su ngumune telanga luteko kwi mungi efile sunga kwi muntu kampanda kukaasha koodi obe nabeene. Muntu sha kookyela, abamwele mu bwina bwa ntambwe.’ Daryuse tauku bwakinyi abakumina shi eele uno mwiya nya. Kadi apwandikisha shi, kino nkinangu kibuwa, na aye nkufundisha mwiya ku mikanda. Binobino, takwi muntu mukumbeene kushintuula mwiya.

Danyele pabapusha wawa mwiya, balukiile ku nshibo bwa kuteka, anka bu bibaadi akitshi misusa yooso. Bantu bebubi abaadi abauku shi Danyele ta mukumbeene kuleka kwela nteko kwi Yehowa nya. Abaadi abapwandikisha shi abapu kupeta mushindo wa kwipaa Danyele.

Nfumu Daryuse pabapushishe bwakinyi bano bantu abaadi beleshe uno mwiya, benyongwele ngofu. Anka tabaadi mukumbeene kushintuula mwiya, ndjo aye nkutuma eyi bwashi beele Danyele mu bwina bwa ntambwe. Kadi nfumu balungwile Danyele shi: ‘Nakulupila shi Efile oobe ofubila na katshintshi, nyi akupaasha.’

Daryuse mwinyongole toobesha kulaala bwabwa bufuku nya. Pa bubatooko, bende lubilo ku bwina bwa ntambwe. Okwete ku mumona su? Beele musase shi: ‘Danyele, mufuby’Efile atala! Efile oobe ofubila na katshintshi, bamono bya nkupaasha kwi ntambwe su?’

Danyele balulwile shi: ‘Efile Mukulu batumu mwikeyilu aaye bakanga mbangabanga ya ntambwe ta ngi nkite kintu kibubi su nkipeela.’

Nfumu e na muloo ukata. Batumu bantu bwashi batuushe Danyele mu bwina. Akupu batumu bwashi beele baba bantu bebubi abakyebanga kwipaa Danyele mu bwina bwa ntambwe. Pa baabadi tabafile kuushi kwa bwina, ntambwe ibebakukiile na kutshokola mifufwa yaabo yooso.

Akupu Nfumu Daryuse bafundjile mikanda eyituma kwi bantu booso ba mu bufumu bwaye aye nkwamba shi: ‘Naatumu eyi shi muntu ooso atshiine Efile a Danyele. Akitshi bipaso bikata. Mupoososhe Danyele ku ngala ya ntambwe.’

Danyele 6:1-28.