Ndanyele mu buina bua ntambue

Dariuse muina Mede baadi ungi nfumu a mu Babilone. Dariuse baadi akaanyisha Ndanyele kukila bangi bantu. Aye nkumutuula ku mulongo wa bantu basha kineemo ba muiumbo. Baaba bantu boso abaadi bakuasthile Ndanyele kiutu na abaadi abakimbi’shi akatukie munkatshi muabo. Abaadi abauku’shi Ndanyele atekaa Yehowa misuusa isatu efuku dioso, abo nkulungula Dariuse’shi: ‘Abitungu kuikale muiya wa nkulanguila nka pend’obe bupenka. Muntu oso akutua kukookiela muiya, abitungu kumuela mu buina bua ntambue.’ Dariuse baadi mukumiine kiakia kinangu, aye nkuela kiala ku muiya.

Pabaadi Ndanyele mupushe pabitale muiya upia, bayiile mu nshibo yaaye. Aye nkukunama kumpala ku’edidishi, bua kuteka Yehowa. Baaba basha kiutu abatuelele musango umune mu nshibo, abo nkumushikisha kuete kuteka. Abo nkuenda lubilo kui Dariuse mu kumulungula’shi: ‘Ndanyele bakutua nkukookiela. Kuete kuteka Efile Mukulu aaye efuku dioso misango isatu.’ Dariuse baadi mufule Ndanyele, tabaadi akumiina buadia kufua nya. Munda muefuku dishima, baadi akimbi bia kupaasha Ndanyele. Kadi, sunga nfumu nabene tabaadi bia kushintuula muiya wadi mupue kuela kiala nya. Aye nkutuma bantu baaye buabadia kuela Ndanyele mu buina bua ntambue.

Dariuse bakutshilue tulo buabua bufuku, muanda baadi ekalakasha pabitale Ndanyele. Butookie namashika, bayile lubilo ku buina, aye nkuitamina Ndanyele, amuipusha’shi: ‘Efile Mukulu oobe bakupaasha su?’

Dariuse nkupusha eyi. Dibaadi dia Ndanyele! Aye nkualuula Dariuse’shi: ‘Efile Mukulu ande batumu muikeyilu aaye bakanga mbangambanga ya ntambue. Ta nginkite kintu nya.’ Dariuse baapushishe muloo ukata! Aye nkulungula Ndanyele buadia kutuuka mu buina. Ndanyele tabaadi mutapikie su nkapela. Nfumu nkutuma eyi bua ‘kuela bantu babaadi bafunde Ndanyele mu buina.’ Pabaabadi bebeele mu buina, ntambue ibaadi ibadie.

Dariuse nkutumina bantu baaye eyi’shi: ‘Muntu oso atshiine Efile Mukulu a Ndanyele. Aye bapaasha Ndanyele mu buina bua ntambue.’

Obe namu, otekaa Yehowa efuku dioso bu Ndanyele su?