Mwanda wa 82
Mardokea na Esteere
TUBANDE kwaluka bipwa bipela kumongo, kumpala kwashi Esdrase ende ku Yeelusaleme. Mardokea na Esteere mbantu ba kinemo mu bufumu bwa beena Perse. Esteere mukashi a nfumu, na mukwabo Mardokea nyi muntu akabidi e na matalwa mu bufumu. Tubande kutala byabibaadi bikitshikye.
Baledi ba Esteere babafwile pabaadi Esteere kii mukinga, na Mardokea bamukushishe. Kesersese, nfumu a beena Perse e na ebalasa dyaaye mu lupata lwa Suse, na Mardokea ngumune a ku bafubi baaye. Dingi efuku, Vasti mukashi a nfumu bakutshile kumukokyela, ndjo nfumu nkusangula mukashi mupya bwashi ekale mukashi aaye. Ouku mukashi abaadi musangule su? Oolo, basangwile nsongwakashi ebuwa abetanyina bu Esteere.
Okwete kumona uno muntu sha kwitatula abakwete kukunamina kwi bantu booso su? Uno nyi Hamane. Muntu a kinemo mu Perse. Hamane akumina shi Mardokea uno okwete kumona mushale pano ekale dingi amukunamina. Kadi Mardokea takumina nya. Apwandikisha shi ta bibuwa kukunamina uno muntu ebubi. Bino bibafiitshisha Hamane munda ngofu. Na bakitshine bino.
Hamane badimbidiile beena Isaleele kwi nfumu. Aye nkwamba shi: ‘Mbantu bebubi basha bakumina kukokyela ku miiya yoobe, abitungu kwibayipaa.’ Kesersese tauku shi Esteere mukashi aaye mwina Isaleele. Aye nkuteemesha bibamulungwile Hamane, na nkwela mwiya shi efuku kampanda abintungu kwipaa beena Isaleele booso.
Mardokea pabapushishe wawa mwiya, benyongwele bikata. Aye nkutuma bantu bwashi bakalungule Esteere shi: ‘Abitungu olungule nfumu, omusendeele bwashi etupaashe.’ Bino mbikutwene na mwiya wa beena Perse wa kwenda mu kumona nfumu kwashi mukwitamine. Kadi Esteere bayiile kwadi aku namu tamumwitamine. Nfumu bamutambikile mukombo wa oòlò, abilesha shi tayipayibwa nya. Esteere bayitamina nfumu na Hamane ku feete mukata. Kwakwa nfumu bayipusha Esteere kya kumina shi bamukitshine. Esteere bamba shi amulungula anka su aye na Hamane babafiki ku ungi feete ebalumbulwila efuku adilondo.
Ku yawa feete, Esteere balungula nfumu shi: ‘Mwilo wande nami nabeene abakyebe kwituyipaa.’ Nfumu bafiitshi munda. Bamwipusha shi: ‘Nnanyi yawa, na e kunyi, uno mupete kinangu kya kukita byabya?’
Esteere balulwile shi: ‘Yawa muntu, mulwishi, nguno Hamane muntu ebubi!’
Binobino nfumu bakwata nsungu ngofu. Batumu eyi bwashi bayipee Hamane. Akupu, nfumu batuulu Mardokea bu muntu a kabidi mumulondele mu bufumu. Mardokea bakitshine bwashi ungi mwiya wedibwe aupa beena Isaleele bulungantu bwa kulwa bwa kupaasha muwa waabo mwifuku dibaadi ditshibibwe bwa kwibayipaa. Bu bi Mardokea taadi binobino muntu sha kinemo, bantu bebungi ababanga kukwasha beena Isaleele, na beena Isaleele babapashibwa ku maasa a beshikwanyi.