Estere bapaasha muilo waye

Estere baadi nsonguakashi muina Yunda baadi muiumbo dia Pelese mu Suse. Bipua bibungi kunyima, abakuatshile kifuko kiaye mu Yelusalema kui Nabukondonosore. Estere abaadi bamukushe kui Mordekayi mukuabo a mu kifuko, baadi mufubi a Nfumu Asueruse a mu Pelese.

Nfumu Asueruse baadi akimbi ndalamumba mupia. Bafubi baaye nkumutuadila bana bakashi bebuwa boso ba mu diadia eumbo mpa na Estere. Mu baaba boso bakashi, nfumu baadi musangule Estere bua kuikala bu ndalamumba. Mordekayi baadi mutoshe Estere bua kupela kuiukisha ungi muntu’shi aye baadi muina Yunda.

Amane baadi na kuitatula nyi baadi muntu a kabidi kunyima kua nfumu. Baadi akimbi bua’shi muntu oso amukunamine. Anka Mordekayi baadi mupele kukita biabia, nyi buakinyi Amane baadi mumufiitshile munda aye nkukimba bua kumuipaa. Pabaadi Amane mutundule’shi Mordekayi baadi muina Yunda, baadi muate mpango bua kuipaa bena Yunda boso abaadi muiumbo. Baadi mulungule nfumu’shi: ‘Bena Yunda be na binangu bibubi, abitungu webashimishe.’ Asueruse nkumulungula’shi: ‘Kita bioso biokumiina,’ aye nkumupa matalua a kutusha muiya. Amane nkuela muiya aupa bantu matalua’shi muifuku dia 13 dia mueshi wa Adare, abitungu kuipaa bena Yunda boso. Anka Yehowa baadi amono.

Estere tabaadi auku bibaadi abiakula muiya nya. Mordekayi nkumutumina mukanda amulungula’shi: ‘Enda okesambe na nfumu.’ Estere nkulungula Mordekayi’shi: ‘Muntu ooso atuele kui nfumu kuabashii bamuitanyine, e na kia kuipayiibua. Takudi mafuku 30 kushii nfumu kungitanyina! Anka ne kuenda. Su olola mukombo waye, nashaala na muwa. Kadi su apela kuiolola, abangipaa.’

Estere baadi muende muibalasa dia nfumu. Nfumu pabamumuene, baadi mumololuele mukombo waye. Estere nkuifubuila kuadi, nfumu nkumuipusha’shi: ‘Ne kukukitshina kinyi Estere?’ Aye nkumualuula’shi: ‘Nakiebe kuinuitanyina na Amane ku kidibua ku kiolua.’ Pabaabadi ku kidibua, Estere baadi muibetamine dingi musango wa kabidi. Pabaabadi ku kidibua wawa musango wa kabidi, nfumu baadi mumuipushe dingi’shi: ‘Ne nkukitshina kinyi Estere?’ Aye nkumulungula’shi: ‘Kui muntu akiebe kungipaa na muilo wande. Etupaashe namu.’ Nfumu nkumuipusha’shi: ‘Nnanyi akiebe kuinuipaa?’ Aye nkumulungula’shi: ‘Nyi nguno muntu ebubi Amane.’ Asueruse nkufiita munda bikata, aye nkuteka buabadia kuipaa Amane.

Kadi, takubaadi muntu a kukatusha muiya wa Amane nya, sunga nfumu nabeene. Nfumu nkutuula Mordekayi bu muntu a kabidi kunyima kuaye, aye nkumupa matalua a kuela ungi muiya upia. Mordekayi nkutuusha muiya aupa bena Yunda matalua a kuikaluila p’abebatuuku ngoshi. Muifuku dia 13 dia mueshi wa Adare, bena Yunda nkutshokola beshikuanyi nabo. Kubanga paapa, ababangile kutentekiesha kutshokola kuabo ku kipua kioso.