Mwanda wa 83

Bimano bya Yeelusaleme

TALA mudimo ooso wabakwete kukita pano. Beena Isaleele mbepaane mu kwibaka kwa bimano bya Yeelusaleme. Bipwa 152 kumpala, pabaadi Nfumu Nabukodonosore mubutule Yeelusaleme, baponeeshe bimano na ashiika biibi bya lupata kaalo. Beena Isaleele tababaadi bebakuule bimano mususa wa kumpala ubabalukiile mwiumbo dyabo abo abakatuka ku Babilone nya.

Opwandikisha shi bantu abaadi bashaale naminyi munda mwa bino bipwa byooso kushi bimano bifunyishe lupata? Babaadi na moo. Beshikwanyi baabo babaadi na mushindo wa kufika mu kwibalwisha ngoshi. Binobino uno muntu Neemii kwete kukwasha mwilo bwa kwibakuula bimano. Ouku Neemii su?

Neemii mwina Isaleele afiki ku Suse, kubaadi Mardokea na Esteere bashaale. Neemii baadi afubu mu lupango lwa nfumu, na bibaadi bibofule bwashi adye bukuuku na Mardokea mpa na Esteere, mukashi a nfumu. Anka Bible talesha shi Neemii baadi afubila Nfumu Kesersese, mulume a Esteere nya. Baadi ku mufubo wa ungi nfumu abayitamina bu Artakesese.

Tentekyesha shi, Artakesese nfumu ebuwa bapeele Esdrase makuta ebungi a kwenda nawo mu kulumbuula ntempelo a Yehowa. Kadi Esdrase tabaadi mwibakye bimano bya lupata bibaadi bipone nya. Tubande kutala mushindo ubaadi Neemii mukite uno mudimo.

Takudi bipwa 13 kasha Artakesese apa Esdrase makuta a kulumbuula ntempelo. Binobino Neemii taadi mwedi mukata a malofu a Nfumu Artakesese. Bino abilesha shi baadi elela nfumu malofu, na baadi atala shi muntu su ngumune talunganga nfumu. Uno mmudimo wa muulo ukata.

Dingi efuku Hanani mukwabo na Neemii na bangi bantu ba mu nsenga ya beena Isaleele babafikile mu kutembela Neemii. Abo nkumulungula nkalakasho ikwete kupeta beena Isaleele, na mushindo ushaale bimano bya Yeelusaleme bipone. Bino bibenyongweshe Neemii ngofu, na aye nkutuudila Yehowa uno mwanda mu luteko.

Dingi efuku nfumu bamwene shi Neemii mwinyongole, aye nkumwipusha shi: ‘Bwakinyi lukyebo loobe ndwinyongole lelo?’ Neemii bamwalulwile shi mwanda lupata lwa Yeelusaleme lwi mu malwa na bimano byalo mbebibuule. Nfumu bamwipwishe shi: ‘Byabya okyebe kinyi?’

Neemii bamwalulwile shi: ‘Nakumina kwenda ku Yeelusaleme, bwa kwibakuula bimano.’ Nfumu Artakesese mmuntu ebuwa. Balungwile Neemii bwashi ende, na aye nkumukwasha bwashi apete mitshi ya kwibaka nayo. Mafuku apela kunyima kwa’ye kufika ku Yeelusaleme, Neemii balungwile mwilo pabitale ino mpango. Mwilo ubakuminyine byabya binangu, na ubambile shi: ‘Twendeyi mu kwibaka.’

Beshikwanyi ba beena Isaleele babamwene bimano bikwete kwenda na kukamina, abo nkwamba shi: ‘Abitungu twibwee twende mu kwibayipaa, balekye mudimo wa kwibaka.’ Kadi Neemii pabapushishe byabya, baapele beena mufubo tupete na milumbu. Aye nkwibalungula shi: ‘Tanupushanga beshikwanyi beenu moo. Lwayi ngoshi bwa bakwenu, bwa baana benu, bwa bakashi benu na bwa mashibo enu.’

Bantu abakomeeshe mashimba. Abaadi bakwate bina ngoshi byabo bufuku na kanya, abatungunukanga na kwibaka. Mu mafuku penda 52 kwibaka kwa bimano kubapwile. Binobino bantu mbalombeene kushaala kushii moo munkatshi mwa lupata. Neemii na Esdrase bakwete kulongyesha bantu miiya y’Efile Mukulu, na bantu be na muloo.

Kadi myanda tayikwete kukidika bu bibaabadi kumpala kwa beena Isaleele kwenda mu bupika mu Babilone nya. Bakwete kukunkusha mwilo kwi nfumu a beena Perse na abitungu shi bebafubile. Kadi Yehowa baadi mulee shi akyebe kutuma nfumu mupya, na yawa nfumu akyebe kwikasha mwilo mu kufukama. Yawa nfumu nanyi? Mushindo kinyi wayikasha mwilo mu kufukama? Kubakidile bipwa pepi na 450 kushi kuuka kintu kampanda pabitale uno mwanda. Anka mwana a muulo ukata batandjikilwe. Kadi uno ngungi mwanda.

Neemii shapitre 1 mpa na ku 6.