Midimba ya Yelusalema

Tubande kualukiila bipua bipeela kunyima. Neemiya mufubi a Nfumu Asueruse baadi muina Isalele baadi mushale mu Pelese mu Suse. Bakuabo na Neemiya abafikile na mukandu wibubi ku Yunda’shi: ‘Muilo ubaalukiile ku Yelusalema ta wi mu butaale nya. Midimba na biibi bibaabadi babumbule kui bena Babilone ta kui muntu muibiibakie nya.’ Neemiya nkuinyongola. Aye nkukimba bia kuenda mu kukuasha ku Yelusalema na nkuteka Efile Mukulu bua’shi nfumu amutadiile buadia kuenda.

Kunyima, nfumu bamuene’shi Neemiya baadi muinyongole. Aye nkumulungula’shi: ‘Buakinyi omueneka muinyongole biabia. A muanda kinyi?’ Neemiya nkumulungula shi: ‘Ne kukutua kuikala na kinyongua naminyi p’ekale Yelusalema kibundi kiande mu makienga?’ Nfumu nkumuipusha’shi: ‘Okiebe nkukitshiine kinyi?’ Neemiya nkuela luteko musango umune muishimba. Akupu nkumulungula’shi: ‘Ntadiile namu buandia nkuenda ku Yelusalema mu kuibakuula midimba.’ Nfumu Asueruse nkulungula Neemiya bua kuenda mu kuibakuula midimba, akupu nfumu baadi mukite bia’shi amulamiibue kalolo muishinda. Baadi dingi mutuule Neemiya bu mukata a kibundi kia Yunda na kumupa mabaya a kukita biibi bia kibundi.

Pabafikile Neemiya ku Yelusalema, baadi muifuunye midimba ya kibundi. Akupu, aye nkubunga ba tshiite muakuidi na bakunkushi na nkuibalungula shi: ‘Uno mmuanda ngua kukaanya. Abitungu tuipaane mu mudimo.’ Muilo nkukumiina, abo nkubanga kuibakuula midimba.

Anka bangi ba ku beshikuanyi ababangile kuibasepa pa kuakula’shi: ‘Sunga kanyema ka mukiengie ke kuponesha bimano bianuibakuula.’ Bafubi nkushika matui ku bibaabadi abeebakaa abo nkutungunuka na mudimo. Midimba ibaadi ayende na kunyingiila.

Beshikuanyi abaatshile kitshibilo kia kufika ku mpese ilekeene bua kutuuka bena Yelusalema ngoshi mu kabasamushi. Pabapushile bena Yunda mpango yaabo, abapushishe moo. Anka Neemiya baadi muibalungule’shi: ‘Tanutshiinanga nya. Yehowa e neetu.’ Aye nkutuula balami bua kukaluila bafubi, takubaadi mushindo wa’shi beshikuanyi bebatuuka ngoshi nya.

Penda munda mua mafuku 52, abapuile kuibakuula midimba na biibi bia Yelusalema. Neemiya nkutuala bena Levi boso mu Yelusalema bua kukita musangeelo wa kumulambula. Baadi muibabungie mu bisaka bibidi bia ba tuyimba. Abayiile dia ku Kiibi kia Nsulo, mu mpala muabo, abo nkukaamina mu mpese ilekeene ya kibundi. Abo nkuyimba na bindaala na tushiba na mikuasa bua kutumbisha Yehowa. Esela bayile na kisaka kimune, Neemiya na kingi kisaka, mpa na pabaabadi bafumankane ku ntempelo. Muilo oso, balume, bakashi na bana nkutuusha milambu kui Yehowa bua kukita musangeelo. Tuleo tua muloo wabo tubaadi atupushika ku bula.