Mwanda wa 84
Mwikeyilu umune bafiki kwi Madiya
UNO mukashi ebuwa nyi Madiya. Mmwina Isaleele, mushaale mu kibundji kya Nazarete. Efile Mukulu auku shi nyi muntu ebuwa bukile. Nyi bwakinyi batumu mwikeyilu Gabryele bwa kwisamba naaye. Ouku kibafiki Gabryele mu kulungula Madiya su? Tubande kutala.
Gabryele bamulungula shi: ‘Nakwimuna, obe abadi belele mwabi. Yehowa e noobe.’ Kasha Madiya tamwene uno muntu nya. Kwete kwikalakasha, mwanda takwete kupusha kyabipatuula nya. Kadi Gabryele amutadish’eshimba.
Amulungula shi: ‘Twekalanga na moo, Madiya. Yehowa musangale pa mwanda oobe. Nyi bwakinyi akukitshina mwanda ukile buuwa. Okatanda mwana mulume. Na okamuudika eshina dya bu Yesu.’
Gabryele batungunuka na kupatuula shi: ‘Uno mwana akekala muntu mukata, na abakamwitanyina bu Mwana a Efile Mukulu Mukile Kwiyilu. Yehowa akamupa nkwasa a bufumu, bu bibaadi Daviide. Kadi Yesu akekala nfumu bwa looso, na bufumu bwaye ta bwi na nfudiilo nya!’
Madiya bayipusha shi: ‘Byabya abikakitshika naminyi? Ntshi mubande kwibakilwa. Ntshi mubande kufika pepi na mulume, byabya mushindo kinyi wandi mulombeene kutanda mwana?’
Gabryele balulwile shi: ‘Bukome bw’Efile Mukulu abufiki koodi. Nyi mwanda kinyi yawa mwana abakamwitanyina bu Mwana a Efile Mukulu.’ Akupu balungwile Madiya shi: ‘Tentekyesha Elizabete mukwenu. Bantu abaadi abamba shi taadi mukile bununu na tamukumbeene kutanda mwana. Kadi binobino akyebe kutanda mwana mulume. Byabya, uuka shi, takwi kintu su nkimune kikumbeene kukambila Efile Mukulu.’
Paapa Madiya nkwamba shi: ‘Ne mufubi a Yehowa! Byoso bikitshikye kwandi bu bibwamba.’ Yaya nsaa mwikeyilu nkwilekeena naye.
Madiya bayile lubilo mu kutembela Elizabete. Pabapushile Elizabete eyi dya Madiya, mwana basanyine munda mwa Elizabete pa mwanda wa muloo ubaadi nawo. Elizabete bawudile na kikudi ky’Efile Mukulu, aye nkwamba shi: ‘We mwelwe mwabi pankatshi pa bakashi booso.’ Madiya bashalele na Elizabete munda mwa myeshi isatu, akupu balukiile kwaye ku Nazarete.
Madiya baadi pepi na kwiyibakishena na mulume ayitanyinwa bu Yosefe. Kadi pabapusha Yosefe shi Madiya e n’eyimi, bamwene shi tabitungu dingi kumwibakila nya. Paapa mwikeyilu a Efile Mukulu bamulungwile shi: ‘Totshinanga bwa kwata Madiya bu mukashi obe. Mwanda Efile Mukulu nyi bamupa yawa mwana.’ Byabya Madiya na Yosefe abaadi beyibakishene, na abatengyeele bwashi Yesu atandikye.