Gabriele batembela Mariya

Elizabete baadi na nsoguakashi a mu kifuko kiaye abetanyina bu Mariya, baadi mushaale muiumbo dia Nazarete mu Ngalileya. Mariya abaadi bamubangile bulunda kui Yosefe, muntu baadi asèe mabaaya. Pabaadi Elizabete mukumbashe mieshi isamombo n’eyimi, muikeyilu Gabriele baadi mufikie kui Mariya. Amulungula’shi: ‘Nakuimuna Mariya. Obe abadi belele muabi kui Yehowa.’ Tabaadi mushingule kibaadi akiamba Muikeyilu Gabriele nya. Aye nkumulungula’shi: ‘Okayimita eyimi, okatanda muana mulume, omuudikie eshina bu Yesu. Akamunana bu Nfumu. Bufumu buaye abukeekala bua looso.’

Anka Mariya bambile’shi: ‘Tanguukile mulume nya. Nakatanda muana naminyi?’ Gabriele nkumulungula’shi: ‘Ta kui kintu kia kukambila Yehowa nya. Kikudi kiselele akikafiki kodi, akupu okapete muana. Mukuenu Elizabete e n’eyimi namu.’ Mariya nkuakula’shi: ‘Ne mufubi a Yehowa. Bioso bikitshikie bu bibuamba.’

Mariya nkuenda kuiumbo dia miengie mu kutembela Elizabete. Pabaadi Mariya mumuimune, Elizabete bapushile muana asaana munda muaye. Aye nkuula na kikudi kiselele p’aye kuakula’shi: ‘Mariya, Yehowa bakuelela muabi. Nyi ntumbo ikile pa kupeta nyinaaye na Nfumuami kuande.’ Mariya nkuamba’shi: ‘Anyima ande aditumbisha Yehowa.’ Mariya bashaalele na Elizabete mieshi isatu, akupu aye nkualukiila ku Nazarete.

Pabaadi Yosefe mupushe’shi Mariya e n’eyimi, bakimbile kuleka kuyiila Mariya. Anka muikeyilu nkumumuekiela mu kilootua na nkumulungula’shi: ‘Totshinanga kumuibakila. Tamukite kintu kibubi nya.’ Yosefe nkuata Mariya bu mukashi nkamutuula ku nshibo yaaye.