Mwanda wa 85
Kutandikwa kwa Yesu
OUKU uno mwana mukinga su? Uno mwana mukinga nyi Yesu. Bakatuka mukutandika mu kashibo ka nyema. Madiya mmuladishe Yesu mu kidiilo kya nyama. Kadi, bwakinyi Madiya na Yoosefe be mu kano kashibo ka nyema? Ino ta mbalo ibuwa bwashi mwana atandjikye, tanabyo su?
Oolo. Kadi pusha bwakinyi be mu ino mbalo: Nfumu a beena Looma, Keezare Oguste, belele mwiya washi muntu ooso alukye kwabo kwatandwa bwashi akafundjishe eshina dyaaye ku nfishi. Yoosefe baadi mutandikye muno mu Beeteleeme. Kadi aye na Madiya pababafikile kwanka takubaadi nshibo yabadya kushaala nya. Nyi bwakinyi babafikile mu kano kashibo ka nyema. Madiya batandile Yesu mu dyadya efuku! Kadi, nka bu byokwete kumona booso be bibuwa.
Okwete kumona balami bakwete kufika mu kutala Yesu? Abekalanga mu kisuku bufuku abalama mikooko, na etaata dikata dibaadi dibamunyikye. Nyi mmwikeyilu bebatukiile! Balami babaadi na moo ukata. Kadi mwikeyilu bakwile shi: ‘Tanwikalanga na moo! Ne na mukandu wibuwa wa kwinulungula. Lelo uno, mu Beeteleeme, abatanda Mwanana Kidishitu. Akyebe kupaasha bantu! Anumusangana mbamupombeele mu kilamba na bamuladisha mu kidiilo kya nyema.’ Mususa umune kubafikile kibumbu kya bamwikeyilu babayimbanga nkumo y’Efile Mukulu. Akupu bano balami nkwalukiila lubilo nkwenda mu kutala Yesu, na binobino babamusangana.
Ouku bwakinyi Yesu mwilekene na bangi bantu booso? Opwandikisha shi muntu kinyi binyibinyi? Tentekyesha shi, mu mwanda wa kumpala mu uno mukanda atwikalanga besambe pabitale Mwana mbedi a Efile Mukulu. Uno Mwana baadi mutumikye pamune na Yehowa bwa kupanga eyilu na nsenga na bingi bintu. Uno nyi Yesu!
Yehowa baatshile muwa wa Mwana aaye mwiyilu aye nkwiwela munda mwa Madiya. Mususa umune mwana nkubanga kukula munda nka bu abikulaa bangi baana munda wa banyinabo. Kadi, uno baadi Mwana a Efile Mukulu. Ku nfudiilo, Yesu batandikile mu kano kashibo ka nyema mu Beeteleeme. Binobino ouku bwakinyi ba mwikeyilu be na muloo wa kulungula bantu kutadikwa kwa Yesu?