Mikeyilu ayiukisha kutandikua kua Yesu

Mukunkushi a bufumu bwa bena Loma, Kezare Ogiste baadi mutume eyi bua’shi bena Yunda boso baalukiile kuabo mu kubadikiibua. Yosefe na Mariya abayiile ku Beteleme kui bena kifuko ba Yosefe. Mariya baadi peepi na kutanda.

Pababaafikile ku Beteleme, abapetele mbalo ya kushaala mu kikutu kia nyema. Nyi mubaadi Mariya mutande muan’aye Yesu. Baadi mumupoombeleeshe mu bilamba amulaadisha kalolo mu kikutu.

Kubaadi Balami ba mikooko abaadi abalama mikooko yabo bufuku paasha peepi na Beteleme. Musango umune, muikeyilu baadi muimane kumpala kuabo, balami nkuifuunyishua n’etaata dia ntumbo ya Yehowa. Abaadi bakuatshikie na moo, anka muikeyilu bakuile’shi: ‘Lekayi kutshiina. Nenutuadila mukandu wibuwa. Mesiya batandikua leelo uno ku Beteleme.’ Nka mu yaaya nsaa, ba mikeyilu bebungi abamuekiele muiyilu, bakula’shi: ‘Ntumbo ikale kui Efile Mukulu muiyilu, na butaale pa nsenga.’ Akupu ba mikeyilu abaadi bashimine. Balami ba mikooko abakitshine naminyi?

Balami ba mikooko nkuilungushena’shi: ‘Tuendeyi ku Beteleme nka binobino.’ Abo nkuenda bukidibukidi paasha, p’abafikile, abapetele Yosefe na Mariya mu kikutu na muana aabo tooka.

Muntu oso baadi mupushe bibaadi muikeyilu mulungule balami baadi akaanya. Mariya baadi munangushene bikata pabitale mayi a muikeyilu na kuialamiina. Balami babalukiile mu kutala mikooko yabo, na kualusha lutumbu kui Yehowa bwa bioso bibaabadi bamone na kupusha.