Mwanda wa 86

Lwenyenyi alukunkusha bantu

OKWETE kumona lwalwa lwenyenyi lukata lwabakwete kufunka kwi bantu su? Luno lwenyenyi lubatuukile nsaa ibabakatukile ku Yeelusaleme. Bano bantu abafiki Kutunduka nguba, abalongaa nyenyenyi. Mbashinkamishe shi luno lwenyenyi lukwete kwibakunkusha kwi muntu mukata.

Bano bantu pababafiki ku Yeelusaleme, babayipusha shi: ‘Mwana batandikwa akyebe kwikala nfumu a beena Yuuda e kunyi?’ “Beena Yuuda” ndingi eshina dya beena Isaleele. Baba bantu babakwile shi: ‘Tubamono lwenyenyi lwa mwana patwikalanga dya Kutunduka nguba nyi bwakinyi tubafiki mu kumulangwila.’

Eroode baadi nfumu mu Yeelusaleme pabapushishe byabya benyongwele. Tabaadi akumina shi ungi nfumu ashaale pa mbalo yaaye nya. Ndjo Eroode nkwitanyina batshiite-mwakwidi aye nkwibepusha shi: ‘Yawa nfumu ababalayile baadi na kya kutandikwa kunyi?’ Babamwalulwile shi: ‘Mu Bible abalesha shi nku Beeteleeme.’

Paapa Eroode nkwitamina bantu ba Kutunduka nguba, aye nkwamba shi: ‘Endaayi nukayipushe kalolo pabitale yawa mwana mukinga. Su nubamusangana, nunguukishe. Bwashi ami namu nkamulangwile.’ Kadi, Eroode baadi akimbi binyibinyi kumona mwana bwashi amwipee!

Byabya, lwenyenyi lubabadidiile kumpala kwabo lutadiile ku Beeteleeme, alo nkwimana pa mbalo ibaadi mwana. Baba bantu pababatwelele mu nshibo, babasangene Madiya na Yesu mwana mukinga. Babatushile bya buntu byabo abo nkwibipa Yesu. Akupu Yehowa bebalungwile mu kilotwa bya badya kuleka kwaluka kwi Eroode. Babealwishe mwiumbo dyabo abo nkulonda dingi eshinda.

Eroode pabapushishe shi bantu ba Kutunduka nguba babapu kwaluka kwabo, bafiitshile munda ngofu. Aye nkutuma eyi bwashi bayipee baana balume booso ba mu Beeteleeme kubanga pa bipwa bibidi na kwika. Kadi Yehowa badimwishe Yoosefe mu kilotwa kumpala kwa nsaa, na Yoosefe na mukashi aaye abo nkusuukila ku Ejiipitu. Kunyima, Yoosefe pabapushishe shi Eroode baafu, baatshile Madiya na Yesu abo nkwaluka kwabo ku Naazarete. Kwakwa ndjo kubaadi Yesu mukudile.

Opwandikisha shi nnanyi baadi mutume lwalwa lwenyenyi lupya? Tentekyesha shi, baba bantu babayiile ku Yeelusaleme kunyima kwabo kumona lwenyenyi. Satana Diabulu ndjo baadi akyeba kwipaa Mwana a Efile Mukulu, na baadi muukye shi Nfumu Eroode a mu Yeelusaleme akyebe kutompa kumwipaa. Byabya, Satana ndjo baadi mutume lwalwa lwenyenyi bwashi lumunyikye.

Mateo 2:1-23; Mika 5:2.