Yehowa baadi mukaluile Yesu

Mu nsenga ya kutunduka nguba kua Isalele kubaadi bantu abaadi abapuandikisha’shi luenyenyi lui kuibakunkusha. Dingi efuku bufuku, bangi bantu abakatukile dia Kutunduka nguba abamuene kintu akitambuka na kupenyapenya muiyilu bu luenyenyi abo nkuikilonda. ‘Luenyenyi’ nkuibakunkusha ku Yelusalema. Baaba bantu nkubanga kuipusha’shi: ‘A muana akeekala nfumu a bena Yunda e kunyi?’ Tubafiki bua kumuinamina.’

Erode nfumu a mu Yelusalema pabaadi mupushe abakula pabitale nfumu mupia, baadi muinyongole bikata. Baadi muipushe ba tshiite muakuidi be kunundu’shi: ‘Yawa nfumu ababalayile, baadi na kia kutandikua kunyi?’ Abo nkumulungula’shi: ‘Batemuki babaambile’shi mu Beteleme.’ Erode nkulungula baaba bantu’shi: ‘Endayi mu Beteleme nyi muanukapete yawa muana. Nualukiile dino buanudia kundungula kuadi. Nakiebe namu kumuinamina.’ Baadi muibadimbe madimi.

‘Luenyenyi’ nkubanga kutambuka dingi. Baaba bantu nkuilulonda mpa na ku Beteleme. ‘Luenyenyi’ nkuimana muiyilu mua nshibo ibaadi na bantu munda. Abo nkupeta Yesu na nyinaaye Mariya. Abo nkuinamina muana na kumupa bia buntu bia ôlo, musengo wa kabanda na malaashi a mire. Yehowa nyi batumine bano bantu buabadia nkamona Yesu su? Nya.

Yehowa nkulungula Yosefe mu kilootua buabua bufuku’shi: ‘Erode akimbi kuipaa Yesu.’ Ata mukashi oobe na muana oobe nusuukile ku Ejipitu. Nukekushaale mpa’nka na pa nkenulungula’shi alukiilayi.’ Nka yaaya nsaa, Yosefe na kifuko kiaye abayile ku Ejipitu.

Yehowa nyi balunguile baaba bantu ba kutunduka bua kupela kualuka dingi kui Erode. Nsaa ibaadi Erode mumone’shi tambaalukiile, bafiitshile munda. Bu bibakutshilue bia kumona Yesu, baatshile kitshibilo kia kuipaa bana boso ba mulongo wa Yesu mu Beteleme. Anka Yesu bapandile, muanda baadi kula kukile, mu Ejipitu.

Muenda mafuku, Erode bafuile. Yehowa nkulungula Yosefe’shi: ‘Alukiila takui muanda dingi.’ Yosefe, Mariya na Yesu abaadi baalukiile mu Isalele, abo nkuibaka yaabo nshibo mu lupata lua Nazarete.