Mwanda wa 88

Yowano abatshisha Yesu

TALA konyi ka nkudimba kakwete kwika ku mutwe wa mwana mulume. Uno mwana mulume nyi Yesu. Binobino taadi na bipwa pepi na 30. Na uno ungi mwana mulume aadi naaye nyi Yowano. Tatupwile kulonga ingi myanda pabitale Yowano. Okyotentenkyesha nsaa ibaadi Madiya mwende mu kutembela Elizabete, na bibaadi mwana baadi munda mwa Elizabete musane pa mwanda wa muloo ubaadi nawo su? Yawa mwana baadi kii munda nyi Yowano. Kadi binobino Yowano na Yesu bakwete kukita kinyi?

Yowano bakatuka mu kuyina Yesu mu meema a mu Mwela wa Yoordano. Uno ndjo mushindo wababatshishaa muntu. Kya kumpala, abamwinyi mu meema, akupu abamutuusha. Bu bibaadi Yowano akitshi bantu byabya, bantu babaadi abamwitanyina bu Yowano Mubatshishi. Kadi bwakinyi Yowano baadi mubatshishe Yesu?

Yowano baadi mukite byabya mwanda Yesu bafikile amuteka bwashi amubatshishe. Yowano baadi abatshisha bantu babaadi abakumina kulesha shi babenyongola ku myanda ibubi yabadi bakite. Kadi Yesu baadi mukite kintu kampanda ki bubi kibaadi akitungu shi enyongole su? Tabakitshine kintu kibubi nya, mwanda aye nyi Mwana a Efile Mukulu bafikile mwiyilu. Byabya batekyele Yowano bwashi amubatshishe bwa ungi mwanda. Tubande kutala bwakinyi bakitshine byabya.

Kumpala kwashi Yesu afikye kwi Yowano, baadi asèè mabaya. Muntu asèè mabaya nguno akitaa bintu bu, meesa, ma nkwasa na bibasa bya mabaya. Yoosefe mulume a Madiya baadi asèè mabaya na baadi mulongyeshe Yesu wawa mudimo. Kadi Yehowa tabaadi mutume Mwana aaye pa nsenga bwashi ekale asèè mabaya nya. Baadi na mudimo ukata wakukita, na nsaa ibalombeene bwashi Yesu abangye kukita wawa mudimo. Byabya, bwa kulesha shi bafikile binobino bwa kukita akikyebe Nshaaye, batekye Yowano bwashi amubatshishe. Efile Mukulu basangeela kino kintu su?

Oolo, mwanda kunyima kwa Yesu kutuuka mu mema, eyi dibatuukile mwiyilu dyamba shi: ‘Uno nyi Mwan’ande andi mukumine.’ Na dingi, abimweka shi eyilu dibashitukile na kano ka nkudimba kabayikile ku mutwe wa Yesu. Anka kano konyi ta nka nkudimba ka binyibinyi nya. Kakwete kumweneka bu ka nkudimba. Binyibinyi kino nkikudi ky’Efile Mukulu.

Binobino, Yesu e na myanda ibungi ayitungu shi elele binangu, bende ku mbalo ya bupenka bwa mafuku 40. Satana bamulondo ku yaya mbalo. Misango isatu ishima Satana batompele Yesu bwashi atupilwe miiya y’Efile Mukulu. Kadi Yesu tabakuminyine nya.

Kunyima kwa byabya, Yesu balukiile aye nkwimonena na bantu babafikile bu balongi baaye. Bangi abebetanyina bu Andree, Mpyele (ababadi abetanyina nyi bu Simone), Filipe na Natanaele (ababadi abetanyina nyi bu Bartelemii). Yesu na bano balongi baaye abayile ku distrike dya Ngadile. Ku Ngadile abayimeene ku Kana, kibundi kya ba Natanaele. Kwakwa Yesu bayile ku feete a dibaka, na bakitshine kipaso kyaye kya kumpala. Ouku kyakya kipaso su? Balulwile mema afika malofu.

Mateo 3:13-17; 4:1-11; 13:55; Maako 6:3; Yowano 1:29-51; 2:1-12.