Yesu bafiki Mesiya

Yowano baapuile kulambukisha’shi: ‘Kunyima kuande akufiki muntabukile.’ Yesu pabalombeshe bipua bifikie ku 30, bafikile ku Ngalileya enda ku Muela wa Yordane, kubaadi Yowano abatshisha bantu. Yesu baadi akumiina bua’shi Yowano amubatshishe, anka Yowano bambile’shi: ‘Ntshi bia kukubatshisha nya. Obe nyi e kumbatshisha.’ Yesu balunguile Yowano’shi: ‘Yehowa akumiina’shi obe ombatshishe.’ Abayile mu Muela wa Yordane, Yowano nkuyina Yesu aye oso mu mema.

Kunyima kua kutuuka mu mema Yesu belele luteko. Nka mu yaya nsaa, eyilu dibaadi dibuulukie, aye nkumona kikudi kiselele ki’Efile Mukulu akiyiki bu konyi k’ekutshi. Akupu Yehowa nkuakula muiyilu shi: “Obe we Muan’ade andi mufule na andi mukumiine.”

Yesu bafikile Nkidishitu sunga Mesiya nsaa ibaadi kikudi kiselele kia Yehowa kimuikile. Binobino baadi mulombene kubanga mudimo ubaadi Yehowa mumutume bua kukita pa nsenga.

Musango umune aye kiapu kubatshishibua, Yesu bayile mu kabaaka akemukita mafuku 40. Pabaadi mualukiile, bayile mu kumona Yowano. Pabafikile kuadi, Yowano bambile’shi: ‘Uno nyi mMuana a mukooko a Efile Mukulu akatusha miluisho pa nsenga.’ P’aye kuakula bino, Yowano baadi aukisha bantu’shi Yesu baadi Mesiya. Ouku kibaadi kifikile Yesu pabaadi mu kabaaka su? Tubande kutala.