Yowano alumbuula eshinda

Yowano muana a Zakari na Elizabete, bafikile mutemuki pabakudile. Yehowa baadi mufube naye bua kulongiesha bantu pabitale Mesiya, baadi na kia kufika. Pamutue pa kulongiesha mu bitumbuilo sunga mu bibundi, Yowano baadi akalambukisha mu kabaaka. Bantu babaadi abakatuka mu Yelusalema na mu Yudeya mooso bua kuteemesha Yowano. Baadi ebalongiesha bua kuleka kukita bibubi na kusangasha Efile Mukulu. Kunyima kua kumuteemesha, bebungi babaadi belangie kuishimba bua miluisho yabo, akupu Yowano nkuibabatshisha mu Muela wa Yordane.

Yowano baadi na nshalelo mupeelepeele. Baadi afuala bilamba bia buaa bua nyema na kudia mpasu na kulamba buuki. Bantu abaadi abakimbi bua kuuka Yowano. Mpa na Bafadisee na Basanduseo abafikile mu kumumona. Yowano bebalunguile’shi: ‘Abitungu nulekie mashinda eenu nuilangie. Tanumonanga’shi nui na kinemo kikile kuanuakula’shi nui bana ba Abalahama. Biabia t’abileesha’shi nui bana b’Efile Mukulu nya.’

Bebungi abafikile kui Yowano bamuipusha’shi: ‘Tui kukita kinyi bua kusangasha Efile Mukulu?’ Yowano nkuibalungula’shi: ‘Su we na bilamba bibidi, abitungu kupa muntu shi nakio kingi kimune.’ Ouku buakinyi baakuile biabia? Baadi akimbi balongi baaye buabadia kuuka’shi, bua kusangasha Efile Mukulu abitungu kuikala na kifulo na bantu.

Yowano balunguile bafutshishi ba bitadi’shi: ‘Ikalayi balulame na tanuyibanga muntu su ngumune.’ Alungula basalayi’shi: ‘Tanutshibibuanga milomo sunga kudimba madimi.’

Ba Tshiite muakuidi na Bena Levi abaadi bafikie namu kui Yowano bamuipusha’shi: ‘We naanyi? Bantu bebungi abadidi kuuka.’ Yowano baakuile’shi: ‘Ne eyi dia muntu mu kabaaka, adikunkusha bantu kui Yehowa, anka bu bibaadi Yeshaya mubadile kuakula.’

Bantu abaadi bafule mianda ibaadi Yowano ebalongiesha. Bebungi nkuiyipusha su Yowano baadi Mesiya. Anka bebalunguile’shi: ‘Kunyima kuande akufiki muntabukile. Ntshi mulombene sunga kuangula mooshi wa ku sandale yaaye. Ami nenubatshisha mu mema, anka aye akabatshisha na kikudi kiselele.’