Mwanda wa 89
Yesu atoosha ntempelo
YESU amweneka binyibinyi shi mufiite munda. Ouku shi mbwakinyi? Mwanda bano bantu be mu ntempelo a Efile Mukulu mu Yeelusaleme be na lwabi lukile. Bakwete kukimba mushindo wa kupeta makuta ebungi kwi bano bantu bakwete kufika mu kulangwila Efile Mukulu.
Okwete kumona tuno twana twa ngombe na mikooko na nkudimba su? Oolo, bano bantu bakwete kupaana ino nyema muno mu ntempelo. Ouku shi mbwakinyi? Mwanda beena Isaleele be na lukalo na nyema na tonyi twa kulambula Efile Mukulu.
Mu mwiya w’Efile Mukulu abaadi abalesha shi, su mwina Isaleele bakitshi mulwisho, abitungu afikye mu kulambula Efile Mukulu. Kubaadi ingi nsaa dingi, ibaadi ayitungu shi beena Isaleele balambule milambu. Nkunyi kubaadi akutungu shi beena Isaleele bapete nyema ya kulambula Efile Mukulu?
Bangi beena Isaleele babaadi bamune nyema na tonyi. Byabya babaadi na mushindo wa kwiyilambula. Kadi beena Isaleele bebungi tababaadi bamune nyema na ntonyi nya. Bangi babaadi bashaale kwibula na Yeelusaleme takubaadi mushindo washi bafikye na nyema yaabo ku ntempelo nya. Byabya bantu babaadi abafiki pano bwa kuwula nyema na tonyi tubaabadi nato lukalo. Kadi bano bantu babaadi abebatungu muulo wi bukopo. Babaadi abayibi bantu makuta. Na dingi tababaadi na matalwa a kuwudisha bintu muno mu ntempelo a Efile Mukulu nya.
Uno ndjo mwanda ubaadi ufiitshishe Yesu munda. Nyi bwakinyi baalamuna mesa a bantu na kupalakasha nfwalanga yaabo ya bingolongolo. Aye nkuluka lufimbo lwa myoshi, nkubinga nyema mu ntempelo. Batumina bantu bakwete kupaana tu nkudimba eyi shi: ‘Kaashayi byooso byabya pano! Tanwalulanga nshibo ya Nshaami bu nshibo ya busunga.’
Bangi balondji ba Yesu abaadi kuno ku ntempelo mu Yeelusaleme. Bakwete kukanya pakwete kumona Yesu akitshi bino. Binobino babatentekyesha mbalo ya mu Bible ya bamba pabitale Mwan’Efile Mukulu shi: ‘Kifulo kyadi nakyo bwa nshibo yaye akikyebe kumwipaa.’
Yesu paadi muno mu Yeelusaleme bwa kutwela mu Pasaka, bakitshi bipaso bibungi. Akupu, Yesu bakatuka mu Yudeya, babanga lwendo lwa kwalukiila mu Ngadile. Aye nkusambusheena mu distrike dya Samariya. Tubande kutala kibaadi kikitshikye kwanka.