Mwanda wa 91

Yesu alongyesha pa mwengye

TALA pano pashaale Yesu. Kwete kulongyesha bano bantu booso pa mwengye wa Ngadile. Bano bashaale pepi naye nyi mbalongi baaye. Musangule balongi 12 bwashi bekale bu batumibwa baaye. Batumibwa nyi mbalongi ba Yesu bashi bu bangi balongi booso. Ouku mashina abo su?

Kwi Simone Mpyele na mukwabo Andree. Akupu kwi Jaake na Yowano; abo nyi mbaana ba muntu. Ungi mutumibwa baadi ayitaminwa bu Jaake, na ungi namu bu Simone. Batumibwa babidi abaadi na mashina a bu Yudase. Umune nyi Yudase Iskaaryote, na ungi nyi Yudase abayitanyinaa bu Tadee. Kubaadi dingi Fidipe na Natanaele (ayitamwa dingi bu Bartelemii) na Mateo na Tomase.

Pabalukile mu Samariya, Yesu babangile kulambukisha musango wa kumpala shi: ‘Bufumu bwa mwiyilu tabudi pepi.’ Ouku akilesha buno bufumu su? Nyi guvernema eyendo a Efile Mukulu. Yesu ndjo nfumu abo. Akyebe kumunana mwiyilu bwa kutwala kufukama pano pa nsenga. Nsenga ishima ayaluluka mpaladiiso ku bukwashi bwa bufumu bw’Efile Mukulu.

Pano Yesu kwete kulambukisha bantu pabitale bufumu. Kwete kwibapatulwila shi: ‘Talaayi mushindo wanudya kuteka: Yaay’etu e mwiyilu, eshina dyoobe dyende ntumbo. Bufumu boobe bufikye. Kyokyebe kikitshikye pa nsenga, mumune na mwiyilu.’ Bantu bebungi abelwitanyinaa shi: ‘Luteko lwa Mwanana.’ Bangi namu abelwitanyinaa bu luteko lwa ‘Yaay’etu.’ We mukumbeene kwilwambuula looso lushima su?

Yesu kwete dingi kulambukisha bantu mushindo wabadya kukitshina been’abo myanda. Amba shi: ‘Kyooso kyanukyebe shi bantu benukitshine, nanwe namu ebakitshineeyi kyanka.’ Twekalaa na muloo apakukitshina bantu myanda na kalolo su? Byabya, Yesu amba shi, abitungu tukitshine bangi myanda na kalolo kooso. Tomono shi abikekala buuwa bwikashaa mu mpaladiiso apakekala bantu booso abakitshi byabya su?

Mateo shapitre 5 mpa na ku 7; Mat 10:1-4.