Yesu asangula batumibua ekumi na babidi

Kunyima kua kulambukisha pepi kipua kimune na kipindi, Yesu baadi na kia kuata kitshibilo kimune ki na muulo. Badia kusangula nnanyi bua kufuba naaye pamune mu kipuano? Nnanyi abadia kulongiesha bua kukunkusha kakongie ka bena Nkidishitu? Bua kuata bino bitshibilo, Yesu bakimbile buludiki bua Yehowa. Bayile ku muengie kubaadi na kia kuikala bupenka, aye nkuteka bufuku bushima. Ku namashika, Yesu baadi muitanyine bangi ba ku balongi baye, aye nkusangula batumibua 12. Eshina dia nnanyi a kuabadi diotentekiesha? Mashina aabo ngano: Mpiele, Andele, Yakobo, Yowano, Fidipe, Bartelemi, Tomase, Mateo, Yakobo muana a Alfe, Tadee, Simone, na Yundase Iskariote.

Boso ekumi na babidi abaadi na kia kuikala naaye. Kunyima kua’ye kuibalongiesha, bebatumine bua kulambukisha abo banabeene. Yehowa bebapele bukome bua kubinga bikudi bibi na kupaasha basha mikumbo.

Yesu baadi ayitanyina batumibua ekumi na babidi bu ba kuuku baye, na baadi muibakulupile. Bafadisee abaadi abamono’shi batumibua abaadi bantu ba bisumanga bashi balongie. Anka Yesu bebalongieshe biakukita wabo mufubo. Abaadi na kia kuikala na Yesu mu nsaa i na muulo ukata mu muwa waye bu kumpala kua lufu na lusangukilo luaye. Nka bu Yesu, bebungi ba ku ekumi na babidi abaadi ba ku Ngalileya. Bangi abaadi bayibakile.

Batumibua abaadi bantu bashi bapuidikie abakitanga bilubilo. Ingi misango abaadi baakule kushi kubanda kuela kinangu na kuata bitshibilo bibubi. Ingi misango tabaabadi na luishinko nya. Dingi abaadi ingi misuusa abekutuena bua kuuka baadi na muulo. Kadi abaadi bantu bebuwa abaadi bafule Yehowa. Abaadi na kia kuikala kitako kia kakongie ka bena Nkidishitu kunyima kua luendo lua Yesu.