Mwanda wa 92

Yesu abuusha bafwe

UNO mwana mukashi omono pano e na bipwa 12. Yesu mumukwate ku maboko, nyin’aye na nshaaye mbemane mbwipi mwaye. Ouku bwakinyi be na muloo ukata? Tubande kutala.

Nshaaye na uno nsongwakashi nyi muntu mukata abayitanyinaa bu Yayiluse. Dingi efuku mwana aye mukashi bakumbile ngofu, na baadi nka mulale ku lusala. Kadi tabaadi apusha biiya nya. Maladi abaadi aende na kukamina. Yayiluse na mukashi aaye abenyongwele ngofu, mwanda bibaadi abimweka nka shi akyebe kufwa. Baadi mwana abo mukashi umune. Byabya Yayiluse bayile mu kumona Yesu. Baadi mupushe pabitale bipaso bibaadi Yesu kwete kukita.

Nsaa ibaadi Yayiluse mumone Yesu, bibumbu bya bantu bibaadi bimwifunyishe. Kadi Yayiluse batwelele munkatshi mwa bantu na baponene ku ngao ya Yesu. Amwisendeela shi: ‘Mwan’ande mukashi taadi pa kufwa. Fika namu omupashe.’ Yesu bambile shi afiki kunyima.

Pababadi bakwete kutambuka, bibumbu bya bantu bibaadi bikwete kwitakushena bwa kwifubwila pepi naye. Musango umune Yesu bayimeene. Aye nkwipusha shi: ‘Nnanyi yawa bankumu?’ Yesu bapushishe shi ndambo ya bukome ibatuku mwaadi, ndjo aye nkumona shi kwi muntu bamukumu. Kadi nanyi bamukumine? Nyi ngungi mukashi baadi mukumbe munda mwa bipwa 12. Bafikile akuma bilamba bya Yesu, aye nkupanda!

Wawa mwanda ubapeele Yayiluse muloo, mwanda bamwene shi Yesu mukumbeene kupaasha muntu kushi lukalakasho. Kadi abamutumiine mukyendi bwa nkulungula Yayiluse shi: ‘Mwan’obe mukashi baafu. Tokalakashanga dimo Yesu.’ Yesu bapushile byabya na balungwile Yayiluse shi: ‘Totshinanga, akyebe kupanda.’

Pababafikile kwa Yayiluse, bantu abaadi abadidi na kinyongwa kyooso. Kadi Yesu bebalungwile shi: ‘Lekayi kudila. Ta mmufwe nya, mmulale.’ Kadi abaadi abamusepe, mwanda abaadi abauku shi mmufwe.

Paapa Yesu batshile nshaaye na nyinaye na mwana na batumibwa baaye basatu aye nkutwele naabo mu nshibo mubaadi mulale mwana. Bakwatshile mwana ku mboko aye nkumulungula shi: ‘Buuka!’ Aye nkubuuka, nka bu byomono muno mu kifwatulo. Na bayimene abanga kutambuka! Nyi bwakinyi nshaaye na nyinaaye be na muloo ukata.

Uno ta muntu a kumpala ababadi babushe ku lufu kwi Yesu nya. Muntu a kumpla abesambila mu Bible nyi nkasongwalume ka mukashi baadi mufwishe mulume a mu kibundi kya Naine. Akupu, Yesu baadi mubuushe Lazaare, mukwabo na Madiya na Maata. Apakekala Yesu nfumu mu Bufumu bw’Efile Mukulu, akabuusha bantu bebungi ku bafwe. Wawa mwanda taukupa muloo su?

Luuka 8:40-56; 7:11-17; Yowano 11:17-44.