Yesu akitshi bilengieleshi bibungi

Yesu bafikile pa nsenga bua kulungula mukandu wibuwa wa Bufumu bu’Efile Mukulu. Bua kulesha bi’akakitshi pakekala bu Nfumu, Yehowa baadi mumupe kikudi kiselele bua kukita bilengieleshi. Baadi na kia kupaasha basha mikumbo yoso. Mbalo yoso ibadi ende, baadi apasha basha malaadi abaadi abafiki kuadi. Ba mpofu babaadi na kia kumona, ba nshikue abaadi na kia kupusha, bantu bafue bipindi bia mbidi abaadi na kia kutambuka, na baaba abaadi bakuatshibue na bikudi bibi abaadi na kia kupaashibua. Sunga muntu baadi na kia kukuma penda luembe lua kilamba kiaye, baadi na kia kupanda. Bantu abaadi abamulondo koso kubaadi ende. Mpa nka na nsaa ibaadi na kia kuikala bupenka, Yesu tabaadi mubingie muntu su ngumune nya.

Dingi efuku, abaadi batuadile Yesu muntu baadi mufue bipindi bia mbidi ku nshibo ibaadi ashaala. Anka mu nshibo mubaadi muule bantu, takubaadi kipaso kia kuimutuela. Abo nkutubula muasa mu musaka wa nshibo, bayisha yawa muntu mubaadi Yesu. Akupu Yesu balunguile yawa muntu’shi: ‘Ebue otambukie.’ Pabaadi mukite biabia, bantu abaadi bakaanye bikile.

Dingi efuku, pabaadi Yesu atuele mu kibundi, kubafikile bantu ekumi basha mukumbo wa nsudi abaadi bemane kubula ba muela misaase’shi: ‘Yesu, etukuaashe namu!’ Mu aa mafuku, bantu basha mukumbo wa nsudi t’ababadi na matalua a kuifubuila pepi na bangi bantu nya. Yesu nkulungula bantu bua kuenda ku ntempelo, bu bibaadi abiakula Muiya wa Yehowa bua kukita su muntu sha nsudi bapashibua. P’abaabadi abaaluka kuabo abaadi bapashibue. Nsaa ibamuene umune aa kuabadi shi bapashibua, baadi mualukile mu kutumbula Yesu na kutumbisha Efile Mukulu. Nka penda umune a ku bantu ekumi, nyi baadi mutumbule Yesu.

Ungi muana mukashi baadi mukumbe munda mua bipua 12, tabaadi’nyi na lukupilo lua kupanda nya. Baafikile kumongo kua Yesu mu kibumbu kia bantu aye nkukuma ku luembe lua kilamba kiaye kia kunundu. Apanda musango umune. Pabakitshine biabia, Yesu bayipuishe’shi: “Nnanyi bankumu?” Yawa muana mukashi baadi mukuatshikie na moo ukile, anka baafikile kumpala kuaye amulungula bia binyibinyi. Yesu nkumunyingisha p’aye kumulungula’shi: ‘Muan’ande mukashi, enda mu butaale.’

Ungi mukata a basalayi abetanyina bu Yailuse baadi musendeele Yesu amba’shi: ‘Fika naamu kuande! Muan’ande mukashi mmukambilue na maladi.’ Anka, kumpala kua shi Yesu afikie kua Yailuse, muana baadi mufue. Pabafikile Yesu bamuene bantu bebungi abafiki mu kusamba kifuko na maalo. Yesu nkuibalungula’shi: ‘Tanudilanga, ta mmufue mmulaale.’ Akupu bakuatshile yawa nsonguakashi kuiyasa aye nkuakula’shi: “Muan’ande, buuka!” Bebuele musango umune, Yesu nkutuma ba mutande buabadia kumupa kia kudia. Banda kuela kinangu bibaadi ba mutande balombene kupusha!