Mwanda wa 96
Yesu apasha basha maladi
PABAADI Yesu kwete kutambuka mwiumbo dishima, bapashile bantu bebungi babaadi na mikumbo. Mikandu itale byabya bipaso ibaadi ipalakane mu bibundi byooso bya mbwipi. Byabya bantu abaadi abatwala baaba booso abaadi balemane na tumaama na ba mpofu, na bantu bebungi basha mikumbo. Yesu bebapashile booso.
Kubapu kukila bipwa bisatu kasha Yowano bapwile kubatshisha Yesu. Na Yesu balungwile batumibwa baye shi kubashala mafuku apeela bwashi ende ku Yeelusaleme, na kwakwa abakyebe kumwipa, kadi akyebe kubuuka ku bafwe. Mu aa mafuku, Yesu batungunukile na kupasha basha maladi.
Dingi efuku Yesu baadi alongyesha mwifuku dya Sabaato. Sabaato nyi efuku dibaadi beena Yuuda bakwete kwikisha. Uno mwana mukashi okwete kumona pano e na mukumbo ukata. Munda mwa bipwa 18 baadi na mongo utontame, na tabaadi obesha kololoka nya. Byabya Yesu baadi mumutuule maboko, aye nkubanga kololoka. Bapandile!
Byabya bibapele bakata ba bipwilo nsungu. Umune a kwabadi beelele musaase kwi bantu shi: ‘Kwi mafuku asamombo bwa kufuba; byabya, mu aa mafuku ndjo mwanudya kufika mu kwibukisha, kushi mwifuku dya Sabaato.’
Kadi Yesu bamwalulwile shi: ‘Bansesa’yi! Mwifuku dya Kwikisha, ooso a kwanudi’ku taashitula ngombe aaye sunga mpunda aye bwa kwenda mu kumutomesha mema su? Byabya uno loole mwana a Abrahame, baadi kwete kukumba munda mwa bipwa 18, tekeele mupwandikile kupashibwa mwifuku dya Kwikisha su?’
Akupu Yesu na batumibwa baaye abayile ku Yeelusaleme. Pababafikile pepi na kibalo kya Yeeriko, ba mpofu babidi babaadi abatekye bukwashi babapushile shi Yesu kwete kukila. Babelele misaase shi: ‘Mwanana Yesu, etukwashe!’
Yesu bayitanyine bano ba mpofu, aye nkwibepusha shi: ‘Anukyebe nnenukitshine kinyi?’ Abambile shi: ‘Mwanana atukyebe meso etu abuulukye.’ Yesu bakumine meso, paapa abo nkubanga kumona! Ouku bwakinyi Yesu bakitshine bino byooso bipaso bibuwa? Mwanda baadi mufule bantu na baadi akyebe shi bantu bekale na lukumino mwadi. Byabya twi na kya kukumina shi pakekala Nfumu, muntu su ngumune takekala na maladi nya.
Mateo 15:30, 31; Luuka 13:10-17; Mateo 20:29-34.