Mwanda wa 97

Yesu afiki bu nfumu

MAFUKU apeela kunyima kwa kupaasha ba mpofu babidi abaadi abatekye ka pa lusa, Yesu bafikile ku kabundji kapeela ke pepi na Yeelusaleme. Balungwile balongi baaye babidi shi: ‘Endaayi mu kibalo ki kumpala kwenu; anusangana mpunda mwana abadi bashitshikye; mushituleyi numuntwadile pano.’

Pababamutwadiile mpunda, Yesu bakamiine kwanka. Akupu bayile ku Yeelusaleme mushaale ku mpunda. Pabafikile pepi na kibundji, kisaka kya bantu kibafikile mu kufumankana naaye. Bebungi babaadi na bilamba byabo na abaadi abebyala mwishinda. Bangi abatshibile malala. Babaadi abeadisha mwishinda na babaadi abele misaase shi: ‘Ende ntumbo. Nfumu afiki mwishina dya Yehowa!’

Mu mafuku a kala mu Isaleele banfumu bapya babaadi abakamina ku mwana a mpunda bwa kwilesha kwi mwilo. Bino nyi bibakitshine Yesu. Na bano bantu babalesheshe shi abakumina shi Yesu ekale nfumu aabo. Kadi bantu booso tababaadi bakumine nya. Twi bakumbeene kwibimona pa kutala kibaadi kikitshikye mu ntempelo.

Mu ntempelo Yesu baadi mupashe bantu babaadi balemane na ba mpofu. Pabamwene baana bakinga byabya, bababangile kwela misaase na kutumbisha Yesu. Kadi batshiite-mwakwidi pa kupusha byabya abafitshile munda, na babalungwile Yesu shi: ‘Opusha kyabamba?’

Yesu balulwile shi: ‘Oolo; tanwabandile kubala kino kifundwe akyamba shi: “Mukanwa mwa twana tukinga na mwa byaàlàlà, we mutuushe bishima bya nkupa nabyo ntumbo?”’ Byabya baana babatungunukile na kutumbisha nfumu abadi basangule kwi Efile Mukulu.

Tomono shi twi na kya kwikala bu bano baana su? Bangi bantu mbakumbeene kutompa kwitutosha bwashi tulekye kwakula pabitale bufumu bw’Efile Mukulu. Kadi bibuwa tutungunukye na kulungula bantu myanda ibuwa ayikyebe Yesu kukitshina bantu.

Nsaa yashi Yesu abangye kumunana pa nsenga bu nfumu tayibaadi ibande kulombana nya. Ino nsaa ayikalombana mafuku kinyi? Balongi ba Yesu abaadi abakyebe kuuka. Atukyebe kwibimona ungi musango.

Mateo 21:1-17; Yowano 12:12-16.