Mwanda wa 42

Mpunda bakula

KASHA tobopushile mpunda pakula su? Pangi we kwamba shi: ‘Nya, nyema ta ngilombeene kwakula nya.’ Kadi Bible akula pabitale mpunda baadi mwakule. Tubande kumona mushindo ubabidi bikidikye.

Beena Isaleele tabadi pepi na kutwela mu nsenga ya Kanaana. Balake, nfumu a Moabe, kwete kutshina beena Isaleele. Paapa bayitanyisha Balame, muntu sha binangu, bwashi afikye mu kwela beena Isaleele mulwa. Balake balaa Balame makuta ebungi, ndjo Balame bakamina ku mpunda aaye bwa nkemonena na Balake.

Yehowa takumina bwashi Balame alwee mwiilo Waye nya. Ndjo aye nkutuma mwikeyilu na lupete lula mu kwimana mwishinda bwa kwimika Balame. Balame tamono mwikeyilu nya, kadi mpunda aye kwete kumumona. Byabya mpunda kwete akyebe kusuuka mwikeyilu, mpa na bibashala mu kilayi. Balame bafitshi munda ngofu, na bakupila mpunda aye nfimbo.

Ndjo Yehowa bakitshi bwashi Balame apushe akwakula mpunda aye. Mpunda ayipusha shi: ‘Nakitshi kinyi boodya kunkupila?’

Balame bamba shi: ‘Bomwesha nka bu kitesha. Su nadya kwikala na mwele mwiyaasa nadya nkwipa!’

Mpunda nkumwipusha shi: ‘Kiubishi kyande nkya nkukitshina bino su?’

Balame balula shi: ‘Nya.’

Paapa Yehowa babuula meso a Balame bwashi amone mwikeyilu mwimane mu kilayi na lupete. Mwikeyilu amba shi: ‘Bwakinyi bokupila mpunda oobe? Nafiki bwa nkukangila eshinda, mwanda tabitungu shi wende mu kwelela Isaleele mulwa nya. Su mpunda oobe tayikalanga mwikumbe kumpala kwande, nadya kwikala mukwipe nka paapa, anka aye nadya kumuleka shi kalonda.’

Balame bamba shi: ‘Nemulwishe. Ntshimutundule shi noobe ikele mwimane kumpala kwande mwishinda.’ Mwikeyilu balekye Balame na Balame bayile mu kwimonene na Balake. Kyatungunuka na kutompa kwela Isaleele mulwa, kadi, pamutwe wa kwela mulwa Yehowa nkumutuma bwa kwelela Isaleele mwabi misango isatu.

Mbadiko 21:21-35; 22:1-40; 23:1-30; 24:1-25.