Mpunda a Balame aakula

Bena Isalele abaadi bakite bipua bifikie ku 40 mu kabaaka. Abaadi batshokole bibundi bibungi. Binobino, abaakatukile dimo abo nkukashaala mu kipia kia Moabe, eshiya dia muela wa Yordane, nsaa ya kutuela mu nsenga ya mulayilo ibaadi ikumbane. Balake, nfumu a ku Moabe baadi atshinyi tala ashimisha nsenga yaaye kuabadi. Aye nkuitanyisha muntu abeetanyina bu Balame buadia kuenda mu kuela Bena Isalele milua.

Kadi Yehowa balunguile Balame shi: ‘Tuelanga Bena Isalele milua.’ Nka paapa Balame nkupela kuenda. Nfumu Balake baadi mumuitanyishe musango wa kabidi, aye nkumulaa bua kumupa kioso kibaadi nakio lukalo. Balame baadi nka kuete kupela. Efile Mukulu nkumulungula shi: ‘Uuka kuenda, kadi wakule nka penda kia nkulungula.’

Balame baanyine bintu ku mpunda, aye nkuenda mutadiile dia kuushi kua Moabe. Baadi muilumbuule bua nkeela Bena Isalele milua sunga biekala shi Yehowa baadi mumutoshe. Muikeyilu a Yehowa baadi mumuenekiele mpunda aaye muishinda misusa isatu. Balame tabaadi bia kumona muikeyilu, kadi mpunda aaye baadi mumumone. Musango wa kumpala, mpunda balubile eshinda aye nkutuela muifuba. Wa kabidi, mpunda baalamatshile ku lubungo lua mabue, aye nkufikiina luao lua Balame kuanka. Nfudiilo a bioso, mpunda bashaleele munkatshi mu’eshinda. Misango yooso, Balame baadi’nka akupila mpunda na mutshi.

Kunyima kua misusa isatu, Yehowa baakuiishe mpunda. Mpunda bayipuishe Balame shi: ‘Buakinyi otungunuka na kunkupila? Balame nkuakula shi: ‘Okiebe kummona bu kitesha. Nadia nkuipaa su nadia kuikala na lupete.’ Mpunda nkumulungula shi: ‘Onkaaminaa munda mua bipua bibungi. Kasha nta na kukitshinyine dimo bino su?

Akupu Yehowa nkubuula meeso a Balame aye nkumona Muikeyilu. Muikeyilu nkumulungula shi: ‘Yehowa kutosheshe bua kuenda mu kuela Bena Isalele milua.’ Balame namu’shi: ‘Ne muluishe. Tandi naaluka.’ Anka Muikeyilu bambile’shi: ‘We kuenda ku Moabe, kadi wambe kiakia kikulunguile Yehowa.’

Balame baadi mupete dilongyesha su? Nya. Kunyima kua biabia, Balame batompele kuela Bena Isalele milua misango isatu, kadi misango yoso, Yehowa beyikeeshe bu miabi. Nfudilo a bioso, Bena Isalele abakuatshile kibundi kia Moabe, Balame baadi muipayibue. Bibadia kuikala bibuwa bua Balame su baadi mupushishe Yehowa nka musango wa kumpala su?