Mwanda wa 98

Ku Mwengye wa Olive

UNO nyi Yesu mushale ku Mwengye wa Olive. Bano bantu bananka baadi nabo nyi mbalongi baaye. Kwi Andree, Mpyeele, Jaake na Yowano. Kyakya kyokwete kumona kubula nyi ntempelo a Efile Mukulu ku Yeelusaleme.

Kubapu kukila mafuku abidi kasha Yesu twelele mu Yeelusaleme mukamine ku mwana a mpunda. Mu dya Kabidi, ku mbangilo kw’efuku Yesu baadi ku ntempelo. Batshiite-mwakwidi babatompele kukwata Yesu bwa ku mwipaa. Kadi babaadi na moo mwanda bantu mbafule Yesu.

Yesu bayitamine bakata ba bipwilo shi: ‘Nyoka’yi, efuko dia nyoka ya bukyelo!’ Akupu, Yesu bebalungwile shi Efile Mukulu akyebe kwibanyoka mwanda wa myanda ibubi yabadi bakite. Kunyima Yesu bakamiine ku Mwengye wa Olive, na batumibwa baaye bananka babafikile kwadi abo nkubanga kumwela nkonko. Ouku kya bakwete kwipusha Yesu?

Batumibwa babaadi abepusha pabitale myanda ayikyebe kufika kumpala. Abauku shi Yesu akyebe kupudisha bubi booso bwi pa nsenga. Kadi abakumina kuuka nsaa yabikyebe kukitshika. Yesu akyebe kubanga kumunana bu Nfumu nsaa kinyi?

Yesu auku shi balongi baaye pa nsenga tabekala dingi na mushindo wa kumumona nsaa yakalukila nya. Mwanda akekala mwiyilu, na ta kwi mushindo dingi wabadya kumumona mwanka. Byabya Yesu balungula batumibwa baaye ingi myanda ayikyebe kukitshika pa nsenga nsaa yakabanga kumunana bu Nfumu mwiyilu. Yaya myanda, mmyanda kinyi?

Yesu bebalungula shi akukekala ngoshi ikata, bantu bebungi abakekala na mikumbo na nsala, akukekadika bu ntomboshi bukile na kutshinkatshinka kukata kwa nsenga. Yesu bebalungula dingi shi mukandu wi buwa wa bufumu bw’Efile Mukulu aukalungulwa mbalo yooso pa nsenga. Tatumwene bino bintu byooso mu ano mafuku etu su? Oolo! Byabya twi balombeene kushinkamisha shi Yesu kwete kumunana binobino mwiyilu. Mu kapindji kapela akyebe kupudisha bubi booso bwi pa nsenga.

Mateo 21:46; 23:1-39; 24:1-14; Maako 13:3-10.